Германиядан Тошкентга гиёҳванд моддалар юборишга уриниш аниқланди

Тошкент, Ўзбекистон (UzDaily.uz) — Тошкент шаҳрининг Яшнобод туманида Давлат хавфсизлик хизмати ва Божхона қўмитаси ходимлари томонидан гиёҳванд моддалар контрабандасининг олди олинди. Тезкор-профилактик тадбирлар «Хавфсиз ва соғлом мамлакат» дастури доирасида ўтказилди.

Тумандаги почта бўлимларидан бирида Германиядан юборилган жўнатмани олиш вақтида 2001 йилда туғилган, Яшнобод туманида вақтинча яшаб келган Черногория фуқароси қўлга олинди. Тўхтатиш ва тинтув холислар иштирокида ўтказилди.

Посилка белгиланган тартибда текширилганда, ходимлар спорт анжомлари ичига яширилган 3 килограмм «клeфедрон» гиёҳванд моддаси ва 1 килограмм гашишни аниқладилар. Олиб қўйилган моддалар ашёвий далил сифатида расмийлаштирилди.

Шундан сўнг тезкор тадбирлар қўлга олинган шахснинг вақтинча яшаш жойида давом эттирилди. Хонани кўздан кечириш вақтида у ердан умумий оғирлиги 30 грамм бўлган «Альфа-PVP» гиёҳванд моддаси солинган 11 та тайёр «закладка» аниқланди.

Бундан ташқари, ходимлар зип-пакетлар, электрон тарозилар ва бошқа буюмларни ҳам аниқладилар.

Черногория фуқаросига нисбатан жиноят иши қўзғатилди. Ҳозирда тергов ҳаракатлари олиб борилмоқда.