7
Ўзбекистон

Ўзбекистон ва Туркия ҳарбий ҳамкорликни ривожлантиришни муҳокама қилди

Ўзбекистон ва Туркия ҳарбий ҳамкорликни ривожлантиришни муҳокама қилди
Ўзбекистон ва Туркия ҳарбий ҳамкорликни ривожлантиришни муҳокама қилди / Фото: Ўзбекистон Мудофаа вазирлиги.

Тошкент, Ўзбекистон (UzDaily.uz) — Ўзбекистон ва Туркия мудофаа соҳасидаги икки томонлама ҳамкорликнинг бугунги ҳолати ва истиқболларини муҳокама қилди. Бу ҳақда Ўзбекистон Мудофаа вазирлиги Ахборот ва оммавий коммуникациялар департаменти хабар берди.

16 ноябрь куни Ўзбекистон мудофаа вазири, генерал-майор Ботир Қудратхўжаев Туркия Қуролли Кучлари Бош штаби бошлиғи, армия генерали Селчук Байрактарўғлини қабул қилди. Учрашув Мудофаа вазирлигининг марказий аппаратида бўлиб ўтди.

Расмий қабулдан сўнг Ўзбекистон мудофаа вазирининг биринчи ўринбосари — Қуролли Кучлар Бош штаби бошлиғи, генерал-майор Зайнобиддин Иминов ҳамда Туркия Бош штаби раҳбари ўртасида икки томонлама музокаралар ўтказилди.

Учрашув аввалида Байрактарўғлу Ўзбекистонга ташриф буюрганидан мамнунлигини билдириб, мезбон томонга самимий қабул учун миннатдорлик билдирди.

Музокаралар давомида томонлар мудофаа соҳасидаги икки томонлама ҳамкорликнинг бугунги ҳолати ва эришилган натижаларни кўриб чиқди. Шунингдек, истиқболдаги устувор вазифалар юзасидан фикр алмашилди.

Учрашувда мавжуд ҳамкорлик салоҳиятидан самарали фойдаланиш, икки томонлама муносабатларни мустаҳкамлаш ҳамда ҳамкорликнинг янги йўналишларини ривожлантириш масалаларига алоҳида эътибор қаратилди.

Ташриф доирасида Туркия делегацияси Ўзбекистон Ҳарбий хавфсизлик ва мудофаа университетига ҳам борди. Меҳмонларни университет бошлиғининг биринчи ўринбосари, генерал-майор Фарҳоджон Шерматов кутиб олди.

У делегация аъзоларини таълим муассасасининг фаолияти ва асосий вазифалари билан таништирди. Туркия вакиллари, шунингдек, ҳарбий кадрларни тайёрлаш учун яратилган шароитлар, замонавий ўқув-моддий база ҳамда таълим жараёнининг ташкил этилишини кўздан кечирди.

 

Дилафруз Ниязова
Дилафруз Ниязова

Дилафруз Ниязова 2025 йилдан буён UzDaily жамоасида фаолият юритиб, нашрнинг ўзбек тилидаги версияси учун масъулдир.