Тошкент, Ўзбекистон (UzDaily.uz) — Ўзбекистон Қишлоқ хўжалиги вазирлиги ва Жаҳон банкининг мамлакатдаги ваколатхонаси вакиллари аграр соҳани рақамли трансформация қилиш ҳамда замонавий ахборот технологиялари йўналишидаги ҳамкорликни кенгайтириш истиқболларини муҳокама қилди.
Учрашув давомида вазирлик вакиллари жорий этилаётган ахборот тизимлари, соҳани рақамлаштириш бўйича амалга оширилаётган лойиҳалар ва яқин истиқболдаги устувор вазифалар ҳақида маълумот берди.
Томонлар «Рақамли қишлоқ хўжалиги — Агропортал» ахборот тизимига алоҳида эътибор қаратди. Ушбу платформа 100 дан ортиқ хизматни бирлаштиради.
Шунингдек, қишлоқ хўжалиги ерларини сунъий йўлдош орқали мониторинг қилиш, геоахборот технологиялари ёрдамида ер майдонларининг ҳолатини таҳлил этиш ва сунъий интеллект орқали ҳосилдорликни баҳолаш бўйича лойиҳалар муҳокама қилинди.
Учрашув иштирокчилари илғор халқаро ечимларни миллий амалиётга жорий этиш, янги рақамли воситаларни ишлаб чиқиш ва амалга оширилаётган лойиҳалар самарадорлигини ошириш имкониятларини кўриб чиқди.
Музокаралар якунида ҳамкорликни давом эттириш, истиқболли ташаббусларни биргаликда ишлаб чиқиш ва уларни келишилган режалар асосида босқичма-босқич амалга ошириш бўйича дастлабки келишувга эришилди.
