Тошкент, Ўзбекистон (UzDaily.uz) — Тиббиёт ва фармацевтика тармоғини ривожлантириш агентлигиЎзбекистон ва Ҳиндистоннинг Lilavati Hospital & Research Centre тиббиёт муассасаси соғлиқни сақлаш соҳасида қўшма лойиҳаларни амалга ошириш, жумладан, Тошкентда кардиология марказини ташкил этиш истиқболларини муҳокама қилди.
Учрашув Тиббиёт ва фармацевтика тармоғини ривожлантириш агентлиги директори Абдулла Азизов ҳамда Ҳиндистон тиббиёт муассасаси вакиллари ўртасида бўлиб ўтди.
Музокараларда шифохонанинг халқаро бизнес ва глобал ҳамкорлик бўлими раҳбари Вагмаре Бхарат ҳамда Импортчилар кенгаши аъзоси, бош маслаҳатчи доктор Нарендра Патил иштирок этди.
Томонлар Ўзбекистонда хусусий тиббиёт инфратузилмасини давлат-хусусий шериклик (ДХШ) механизмлари, шунингдек, тиббиёт объектларини бошқариш ва улардан фойдаланиш (O&M) моделлари асосида ривожлантириш имкониятларини кўриб чиқди.
Муҳокама қилинган ташаббуслар қаторида Тошкентда кардиология марказини ташкил этиш, Medical City лойиҳаси салоҳиятидан фойдаланиш, 150 ўринли клиника қуриш ҳамда 250 нафар талабага мўлжалланган тиббиёт университетини ташкил этиш масалалари ҳам бор.
Учрашув иштирокчилари ушбу лойиҳаларни амалга ошириш истиқболларини баҳолаш, тиббиёт муассасаларини бошқаришнинг эҳтимолий моделлари ва Ҳиндистон томонининг Ўзбекистонда тиббиёт инфратузилмасини ривожлантириш бўйича тажрибасини қўллаш масалаларини ҳам муҳокама қилди.
