Тошкент, Ўзбекистон (UzDaily.uz) — 2026 йил январь–август ойларида Ўзбекистонда яшил энергия ишлаб чиқариш ҳажми 9,1 млрд кВт·соатга етди. Сўнгги тўрт йил давомида ушбу йўналишни ривожлантириш ҳисобига 6,5 млрд куб метрдан ортиқ табиий газ тежалди ва атмосферага 14,5 млн тоннадан зиёд зарарли газлар чиқарилишининг олди олинди.
Қайта тикланувчи энергия ишлаб чиқариш ҳажмининг ўсиши мамлакат ёқилғи-энергетика секторида амалга оширилаётган кенг кўламли ислоҳотлар фонида кузатилмоқда. Тармоққа тўғридан-тўғри хорижий инвестициялар жалб этилмоқда, энергетика тизимини ривожлантириш эса яшил энергия манбаларидан фойдаланишни кенгайтириш, рақамлаштириш ва самарадорликни оширишга йўналтирилган.
Ўзгаришлар кўламини энергия ишлаб чиқариш динамикаси ҳам акс эттиради. Агар 2022 йилда Ўзбекистонда 434 млн кВт·соат яшил энергия ишлаб чиқарилган бўлса, 2026 йилнинг дастлабки саккиз ойида бу кўрсаткич 9,1 млрд кВт·соатни ташкил этди.
Мамлакатда «Қуёшли хонадон» дастурини амалга ошириш ҳам жадаллашмоқда. Ушбу дастур доирасида давлат 2021 йилдан буён хонадонларда қуёш панеллари орқали ишлаб чиқарилган ортиқча электр энергиясини сотиб олиб келмоқда.
2024 йилда электр энергиясини тармоққа узатгани учун 10 мингдан ортиқ фуқарога тўловлар амалга оширилди. Ўтказилган маблағларнинг умумий миқдори 12,1 млн сўмни ташкил этди.
2026 йил январь–июнь ойларида тўлов олувчилар сони қарийб 70 минг кишига етди, тўловларнинг умумий ҳажми эса 330,8 млрд сўмни ташкил қилди.
