Тошкент, Ўзбекистон (UzDaily.uz) — Ўзбекистон Солиқ қўмитаси делегацияси Иқтисодий ҳамкорлик ва тараққиёт ташкилотининг (ИҲТT) Солиқ мақсадларида шаффофлик ва ахборот алмашинуви бўйича Глобал форуми Эксперт баҳолаш ва мониторинг гуруҳи (PRMG) йиғилишида иштирок этди.
Ишчи сессиялар Париж шаҳрида бўлиб ўтди. Тадбир доирасида Ўзбекистон Глобал форум томонидан ўтказилган эксперт текшируви жараёнида баҳоланаётган юрисдикция сифатида иштирок этди.
Баҳолаш жараёни қарийб бир йил давом этди. Бу даврда Солиқ қўмитаси Глобал форум экспертлари гуруҳи билан ҳамкорлик қилди, шунингдек, ишга мамлакатнинг тегишли вазирлик ва идоралари жалб этилди.
Тартиб-таомил доирасида мутахассислар солиқ шаффофлигига алоқадор миллий қонунчилик ва давлат органларининг иш амалиётини ўрганди. Шунингдек, амалдаги маъмурий тартиб-таомиллар халқаро талабларга мувофиқлиги нуқтаи назаридан таҳлил қилинди.
Ишчи сессиялар давомида асосий эътибор сўров бўйича ахборот алмашиш халқаро стандарти (EOIR)ни амалга оширишга қаратилди. Иштирокчилар ўтказилган эксперт баҳолаш натижаларини ҳам муҳокама қилди.
Ўзбекистон 2022 йилдан буён ИҲТTнинг Глобал форуми аъзоси ҳисобланади. Ташкилот таркибига кирувчи давлатлар ва юрисдикциялар учун эксперт баҳолашидан ўтиш белгиланган тартиб-таомилларда назарда тутилган. Ушбу баҳолаш миллий қонунчилик ва ҳуқуқни қўллаш амалиётининг шаффофлик ҳамда сўров бўйича ахборот алмашиш халқаро стандартига қай даражада мувофиқлигини аниқлаш имконини беради.
Жараён якунлари бўйича Ўзбекистоннинг расмий ҳисоботи ва баҳолаш натижалари белгиланган тартиб-таомиллар тугалланганидан сўнг ИҲТT сайтида эълон қилинади.
Мамлакатнинг эксперт баҳолашида иштирок этиши солиқ шаффофлигининг халқаро стандартларини жорий этиш ҳамда бошқа давлатларнинг солиқ маъмуриятлари билан ҳамкорликни ривожлантириш бўйича амалга оширилаётган ишларни акс эттиради.
