Тошкент, Ўзбекистон (UzDaily.uz) — Тошкент халқаро аэропортида божхона ходимлари декларация қилинмаган заргарлик буюмлари ва олтин қуймаларининг Ўзбекистонга олиб кирилишига чек қўйди. Уларнинг умумий қиймати 1,2 миллиард сўмни ташкил этган. Бу ҳақда «Тошкент-АЭРО» ихтисослаштирилган божхона комплекси матбуот хизмати хабар берди.
Дубайдан келган йўловчининг юки текширилганда, божхона ходимлари умумий оғирлиги 921,37 грамм бўлган 141 та заргарлик буюми, шунингдек, учта олтин қуймани аниқлаган.
Бундан ташқари, юклар орасида акциз маркалари бўлмаган 120 қути тамаки маҳсулоти ва никотинли снюснинг 90 донаси ҳам бўлган.
Аниқланган қоидабузарлик ҳолати юзасидан жиноят иши қўзғатилган.
Аввалроқ Андижон ва Фарғона вилоятларида яшовчи беш нафар шахс Ўзбекистондан Ҳиндистонга 1,1 миллиард сўмлик олтинни олиб чиқишга уринган эди. Улар умумий оғирлиги 755 грамм бўлган олтин қуймалар ва заргарлик буюмларини танаси ичига яширган.
