Тошкент, Ўзбекистон (UzDaily.uz) — Ўзбекистон Ташқи ишлар вазири Бахтиёр Саидов Токиода Япония бизнес федерацияси «Кэйданрен» раиси Такэси Хасимото ва Япониянинг етакчи компаниялари раҳбарлари билан давра суҳбати ўтказди.
Томонлар иқтисодий ҳамкорликни кенгайтириш ва янги инвестиция лойиҳаларини амалга ошириш масалаларини муҳокама қилди. Бу ҳақда Бахтиёр Саидов маълум қилди.
Тадбирда Mitsui O.S.K. Lines, Sojitz, All Nippon Airways, Shimizu, JETRO, Sumitomo, JBIC, Toyo Engineering, Toyota Tsusho, Marubeni, Mitsui, Mitsubishi ва Япониянинг бошқа йирик компаниялари вакиллари иштирок этди.
Учрашувда Ўзбекистон–Япония иқтисодий ҳамкорлигини янада ривожлантиришга асосий эътибор қаратилди. Хусусан, Япония компанияларининг Ўзбекистондаги фаолиятини қўллаб-қувватлаш ва янги инвестиция ташаббусларини амалга ошириш масалалари муҳокама қилинди.
Иштирокчилар энергетика, транспорт ва логистика, инфратузилма, қишлоқ хўжалиги ҳамда тўқимачилик саноати соҳаларида ҳамкорликни кенгайтириш имкониятларини кўриб чиқди.
Шунингдек, томонлар рақамлаштириш ва кадрлар тайёрлаш соҳаларидаги ҳамкорлик истиқболларини муҳокама қилди.
Саидовнинг таъкидлашича, очиқ ва амалий руҳда ўтган мулоқот Ўзбекистоннинг Япония бизнеси билан ҳамкорлигини аниқ лойиҳалар ва янги ташаббуслар билан бойитиш йўлидаги қадам бўлди.
