Тошкент, Ўзбекистон (UzDaily.uz) — Сурхондарё вилоятида божхона ходимлари Афғонистондан 52 килограммдан ортиқ гиёҳвандлик воситаларини олиб киришга уринишнинг олдини олди. Бу ҳақда Божхона қўмитаси матбуот хизмати хабар берди.
1 октябрь куни соат тахминан 22:30 да «Айритом» чегара божхона постига Афғонистондан бўш юк автомобили кириб келган. Божхона назорати вақтида хизмат ити транспорт воситасига реакция билдирган.
Шундан сўнг Термиз туманида яшовчи 34 ёшли ҳайдовчи бошқарувидаги юк автомобили чуқурлаштирилган кўрикдан ўтказилган. Божхона ходимлари тиркамада махсус яширин жойга беркитилган тақиқланган моддалар солинган 98 та ўрамни аниқлаган.
Божхона қўмитаси маълумотларига кўра, юкни катта ҳажмли инспекцион-рентген ускунаси ёрдамида аниқлашни қийинлаштириш мақсадида ўрамлар полиэтилен, фольга ва скотчнинг тўрт қавати билан ўралган.
Экспертиза натижасига кўра, 79 та ўрамда гашиш, яна 19 тасида эса опий бўлган. Жами 42 килограмм 335 грамм гашиш ва 10 килограмм 260 грамм опий мусодара қилинган.
Аниқланган гиёҳвандлик воситаларининг умумий оғирлиги 52 килограмм 595 граммни ташкил этган.
