Тошкент, Ўзбекистон (UzDaily.uz) — Ўзбекистонда Мактабгача ва мактаб таълими вазирлиги ҳамда Олий таълим, фан ва инновациялар вазирлиги негизида ягона Таълим ва фан вазирлиги ташкил этилди. Тегишли қарор Ўзбекистон Республикаси Президентининг фармони билан қабул қилинди.
Ислоҳот замонавий талабларни ҳисобга олган ҳолда таълим, тарбия ва фаннинг ягона тизимини шакллантириш, шунингдек, таълим сифати ва самарадорлигини ошириш ҳамда инсон капиталини ривожлантиришга қаратилган.
Асосий вазифалардан бири таълимнинг турли даражалари ва турлари ўртасида интеграция ҳамда узвийликни таъминлаш этиб белгиланди. Мактабгача таълимдан тортиб олий таълимгача бўлган бутун таълим жараёнини, шунингдек, илмий фаолиятни қамраб олувчи ягона бошқарув тизимини яратиш назарда тутилмоқда.
Ўзгаришлар доирасида таълим ва илм-фан тизимининг жамият олдидаги ҳисобдорлигини ошириш вазифаси ҳам белгиланган.
Соҳавий идораларни бирлаштириш таълимнинг турли босқичлари ва илмий соҳа ўртасида ягона бошқарув тизими доирасида янада изчил ҳамкорликни таъминлашга қаратилган.
