Тошкент, Ўзбекистон (UzDaily.uz) — Ўзбекистон Марказий банки 24 сентябрдан бошлаб 46-Жаҳон шахмат Олимпиадаси — «Самарқанд 2026»га бағишланган эсдалик тангаларини сотувга чиқаради. Бу ҳақда Ўзбекистон Марказий банки хабар берди.
Тўплам икки хил тангадан — соф олтин ва кумушдан тайёрланган тангалардан иборат. Олтин тангаларнинг асиллик даражаси 999,9 бўлиб, ҳар бирининг вазни 31,1 граммни ташкил этади. Тиражи 100 дона билан чекланган.
Кумуш тангаларнинг ҳам вазни 31,1 грамм, асиллик даражаси эса 999,9 ни ташкил қилади. Кумуш тангалар тиражи 500 донани ташкил этади.
Эсдалик тангаларини тижорат банклари ва уларнинг филиалларидан харид қилиш мумкин бўлади. Улар алоҳида, шунингдек, икки тангадан иборат коллекцион тўплам таркибида ҳам сотилади.
Тангаларнинг нархи ва муайян банкларда мавжудлиги ҳақидаги маълумотларни Марказий банк яқин вақт ичида ўзининг расмий веб-сайти ва ижтимоий тармоқлардаги саҳифаларида жойлаштиришни режалаштирмоқда.
