Xitoyda O‘zbekiston uchun barqaror konchilik tajribasi o‘rganildi

Toshkent, O’zbekiston (UzDaily.uz) — 5–18 avgust kunlari Pekin va Sian shaharlarida «O‘zbekistonda konchilik sanoatini barqaror rivojlantirish» mavzusida seminar bo‘lib o‘tdi. Unda O‘zbekiston Tog‘-kon sanoati va geologiya vazirligi hamda unga qarashli tashkilotlar mutaxassislari ishtirok etdi. Bu haqda Tog‘-kon sanoati va geologiya vazirligi xabar berdi.

Seminar ishtirokchilari tarmoqning strategik rivojlanishi va transformatsiyasi uchun masʼul xodimlardan iborat bo‘ldi. Tadbir doirasida ular Xitoyning geologiya va tog‘-kon sanoati sohasidagi tajribasi, shuningdek, mineral resurslardan oqilona foydalanish yondashuvlari bilan tanishdi.

ESG tamoyillarini qo‘llash, ekologik monitoring va geologik jarayonlarni raqamlashtirish masalalariga alohida eʼtibor qaratildi. Seminar davomida olingan bilimlar Xitoy konchilik sanoatida qo‘llanilayotgan amaliy yechimlar bilan tanishish orqali boyitildi.

Sian shahrida ishtirokchilar geologiya-qidiruv jarayonlarini raqamlashtirishga mo‘ljallangan “Geosite” tizimi bilan tanishdilar.

Bundan tashqari, ular Xitoyning yirik sanoat korxonalarida barqaror rivojlanish sohasida to‘plangan amaliy tajribani o‘rgandilar.

Seminar geologiyani rivojlantirish, mineral resurslardan samarali foydalanish, ekologik jihatlar va tog‘-kon sanoatini raqamli transformatsiya qilish bilan bog‘liq yo‘nalishlarda tajriba almashishga bag‘ishlandi.