Samarqand «Jahon hunarmandchilik shahri» maqomiga ega bo‘ldi

Toshkent, O’zbekiston (UzDaily.uz) — Samarqand shahri «Jahon hunarmandchilik shahri» maqomiga ega bo‘ldi. Mazkur maqom berilganini tasdiqlovchi sertifikat Samarqand viloyati hokimi Adiz Boboyevga Jahon hunarmandchilik kengashi prezidenti Saad Hani Al-Qaddumiy bilan uchrashuv yakunida topshirildi.

Uchrashuvda hunarmandchilikni yana-da rivojlantirish, milliy amaliy sanʼat anʼanalarini asrab-avaylash va ularni O‘zbekistondan tashqarida targ‘ib qilish masalalari muhokama qilindi.

Hunarmandlar faoliyati uchun qulay sharoitlar yaratish va ustozdan shogirdga kasbiy ko‘nikma hamda tajribani o‘tkazishni nazarda tutuvchi “ustoz-shogird” anʼanasini rivojlantirishga alohida eʼtibor qaratildi.

Samarqandga «Jahon hunarmandchilik shahri» maqomining berilishi hududning ko‘p asrlik hunarmandchilik anʼanalarini qo‘llab-quvvatlash va mahalliy ustalar uchun imkoniyatlarni kengaytirishga qaratilgan. Shuningdek, milliy amaliy sanʼat namunalarini xalqaro darajada yana-da keng targ‘ib qilish kutilmoqda.

Tomonlar hunarmandchilik va turizm sohalaridagi hamkorlikni davom ettirishga kelishib oldilar.

Olingan maqom mazkur yo‘nalishlarda xalqaro aloqalarni rivojlantirishga ham xizmat qilishi kerak. Bu haqda Samarqand viloyati hokimligi xabar berdi.