Toshkentda yashil hududlar va parklarni kengaytirish rejalashtirilmoqda

Toshkent, O’zbekiston (UzDaily.uz) — Toshkent shahrida yashil hududlar va jamoat makonlarini rivojlantirish ishlarini jadallashtirish zarur. Bu haqda O‘zbekiston Prezidenti Administratsiyasi rahbari Saida Mirziyoyeva maʼlum qildi.

Uning so‘zlariga ko‘ra, poytaxt jadal surʼatlarda rivojlanmoqda, biroq shaharda yashil hududlar yetarli emas. Shu bois yangi parklar barpo etish va ko‘kalamzorlashtirilgan hududlarni kengaytirish ustuvor vazifalardan biri hisoblanadi.

Saida Mirziyoyeva shahardagi bir qator obyektlarga tashrif buyurib, ularni rivojlantirish va aholi uchun yana-da qulay qilish rejalarini muhokama qildi. Xususan, Afrosiyob ko‘chasida joylashgan parkni barcha shahar aholisi uchun ochiq va qulay jamoat makoniga aylantirish rejasi ko‘rib chiqildi.

Shuningdek, Sayilgoh ko‘chasi, Amir Temur shohko‘chasi va ularga tutash hududlarni yangilash, Bobur nomidagi Ekopark hamda Mirzo Ulug‘bek nomidagi parkni kengaytirish loyihalari ham muhokama qilindi.

«Asosiy ustuvor vazifa — poytaxtga yashil shahar maqomini qaytarish, odamlar uchun faol dam olish va sayr qilish imkonini beradigan imkoni qadar ko‘proq hududlar yaratishdir», — dedi Saida Mirziyoyeva.

U shahar muhitini yana-da qulay qilish, ko‘kalamzorlashtirish ishlarini kengaytirish, xavfsizlikni oshirish va mavjud infratuzilmadan samarali foydalanish muhimligini taʼkidladi.

Prezident Administratsiyasi rahbarining taʼkidlashicha, poytaxt aholisi uchun yuqori hayot sifatini taʼminlash maqsadida bu yo‘nalishdagi ishlarni hozirdan izchil davom ettirish zarur.