Toshkent va Andijanda korrupsiya bilan bog‘liq jinoyatlar fosh etildi

Toshkent, O’zbekiston (UzDaily.uz) — Davlat xavfsizlik xizmati xodimlari Iqtisodiy jinoyatlarga qarshi kurashish departamenti bilan hamkorlikda Toshkent shahri va Andijon viloyatida korrupsiya va firibgarlik bilan bog‘liq ikki holatni aniqladi. Har ikki holat yuzasidan jinoyat ishlari qo‘zg‘atilib, tergov harakatlari olib borilmoqda.

Toshkent shahrida tezkor tadbirlar Davlat xavfsizlik xizmati Call-markaziga kelib tushgan murojaat asosida o‘tkazildi. Natijada Yashnobod tumani Kadastr agentligi bo‘limining bosh inspektori vositachi orqali 2 ming AQSH dollari olgan vaqtida qo‘lga olindi.

Tergov maʼlumotlariga ko‘ra, inspektor o‘z xizmat mavqeidan foydalanib, mahalliy fuqarodan noqonuniy o‘rnatilgan yengil konstruksiyani buzdirish choralarini ko‘rmaslik va uni jarima ko‘rinishidagi maʼmuriy javobgarlikka tortmaslik evaziga pul talab qilgan.

Andijon viloyatida esa 1984 yilda tug‘ilgan Andijon shahri fuqarosi mazkur ish bo‘yicha gumonlanuvchi sifatida ko‘rilmoqda. Tergov versiyasiga ko‘ra, u xaridorga Andijon tumanining Haqon sanoat hududida joylashgan va davlat zaxirasida bo‘lgan 40 sotix yer uchastkasini sotib olishni taklif qilgan.

Gumonlanuvchi mazkur yer uchastkasini E-auksion elektron savdo maydonchasi orqali qo‘lga kiritganini daʼvo qilib, kadastr tizimidagi tanishlari yordamida uni xaridor nomiga rasmiylashtirib berishni vaʼda qilgan. Bu xizmatlari uchun u 160 ming AQSH dollari talab qilgan.

Shaxs Davlat xavfsizlik xizmati, ichki ishlar organlari va Iqtisodiy jinoyatlarga qarshi kurashish departamenti xodimlari tomonidan o‘tkazilgan qo‘shma tezkor tadbir davomida 80 ming AQSH dollari miqdoridagi avans pullarini olayotgan vaqtida qo‘lga olindi. Ushbu holat yuzasidan ham jinoyat ishi qo‘zg‘atildi.