Raqobat qo‘mitasi maktab tovarlari narxlari haqida ogohlantirdi
Toshkent, O’zbekiston (UzDaily.uz) — O‘zbekiston Raqobat qo‘mitasi tadbirkorlarni mavsumiy «maktab bozorlari»da maktab formasi, darsliklar, kanselyariya buyumlari va boshqa tovarlar narxini asossiz oshirishga yo‘l qo‘yilmasligi haqida ogohlantirdi. Bu haqda Raqobat qo‘mitasi xabar berdi.
Yangi o‘quv yili arafasida mamlakat bo‘ylab umumtaʼlim maktablari huzurida, dehqon bozorlari va savdo majmualarida bunday savdo maydonchalari ish boshladi.
Qo‘mita sotuvchilarga qonunchilik talablariga rioya qilish, sotilayotgan mahsulotlar sifatini taʼminlash va xaridorlarga tovar haqida to‘liq maʼlumot berish zarurligini eslatdi. Jumladan, mahsulotda yoki uni sotish joyida narxi va ishlab chiqaruvchi haqidagi maʼlumotlar ko‘rsatilishi kerak.
Xaridorlarga esa maktab tovarlarini xarid qilishdan oldin ularning sifatini tekshirish va narxlarni solishtirish tavsiya etildi.
«Maktab bozorlari»dagi narxlarni nazorat qilish maqsadida Raqobat qo‘mitasi monitoring o‘tkazmoqda. Tovarlar narxining asossiz oshirilgani aniqlangan taqdirda, fuqarolar bu haqda 1159 yagona ishonch telefoni orqali xabar berishlari mumkin.
Yangi o‘quv yilida 795 ming nafardan ortiq bola birinchi marta maktab partasiga o‘tiradi. Har bir birinchi sinf o‘quvchisi uchun 12 turdagi maktab anjomlaridan iborat «Prezident sovg‘asi» tayyorlangan.
