O‘zbekistonda islom bankini joriy etishning huquqiy asoslari tayyorlanmoqda

Toshkent, O‘zbekiston (UzDaily.uz) — O‘zbekistonda islom bankini rivojlantirish uchun qonunchilik bazasi tayyorlanmoqda.

15 sentabr kuni O‘zLiDeP fraksiyasi yig‘ilishida O‘zbekistonda islom bankini rivojlantirish uchun shart-sharoit yaratishga qaratilgan bir qator qonun hujjatlariga o‘zgartish va qo‘shimchalar kiritish to‘g‘risidagi qonun loyihasi muhokama qilindi.

Bugungi kunda amaldagi qonunchilikda islomiy moliyalashtirishning asosiy vositalaridan foydalanishga to'sqinlik qiluvchi cheklovlar mavjud.

Xususan, tijorat banklarining savdo faoliyatida bevosita ishtirok etishi yoki qo‘shma korxonalar tashkil etishi taqiqlanadi, islom modeli esa savdo va sheriklikni moliyalashtirishni nazarda tutadi.

Yangi qonun loyihasi ushbu to‘siqlarni bartaraf etish va milliy qonunchilik bazasini xalqaro standartlarga, jumladan, AAOIFI va IFSB talablariga moslashtirishni nazarda tutadi.

Qonunning qabul qilinishi mamlakatimizda islom banklari va “Islom darcha”lari faoliyatini tartibga solish, aholi va tadbirkorlik subyektlarining muqobil moliyaviy xizmatlardan foydalanish imkoniyatlarini kengaytirish, xorijiy sarmoyalarni jalb etish imkonini beradi.

Birlashgan Millatlar Tashkiloti Taraqqiyot Dasturi (BMTTD) tomonidan oʻtkazilgan soʻrov natijalariga koʻra, Oʻzbekiston aholisining 68% va biznes vakillarining 60% diniy eʼtiqodi tufayli anʼanaviy bank xizmatlaridan foydalanishni istamaydi.