Toshkent, O‘zbekiston (UzDaily.uz) — Bugungi kunda Tataristonning "Tatlift" kompaniyasi tomonidan Qashqadaryo viloyatida rejalashtirilayotgan lift ishlab chiqarish loyihasi bo'yicha muzokaralar olib borilmoqda.

"Tatlift" kompaniyasi mutasaddilari "O'zeltexsanoat" uyushmasiga tashrif buyurdilar.

Tashrif doirasida tashkil etilgan uchrashuvda uyushma raisi o'rinbosari Jahongir Jamalov, "Tatlift" kompaniyasi bosh direktori Gulshat Zagidullina, Qashqadaryo viloyati hokimi o'rinbosari Alisher Zakirov va boshqa mas'ullar ishtirok etdilar.

Uchrashuv avvalida, "Tatlift" kompaniyasi faoliyati, yangi loyiha bo'yicha rejalari haqida taqdimot qilindi.

Shu bilan birga, uyushma mas'ullari tomonidan yurtimiz elektrotexnika sanoati, unda yaratilgan imkoniyatlar haqida batafsil ma'lumotlar taqdim etildi.

Yakunda, tomonlar loyihani amalga oshirishning navbatdagi bosqichlarini aniqlab, bu bo'yicha hamkorlikni izchil davom ettirishga kelishdilar.