Oʻzbekiston va Xitoy qashshoqlikka qarshi kurashni kuchaytirmoqda

Toshkent, O‘zbekiston (UzDaily.uz) — Oʻzbekiston–Xitoy Hukumatlararo qoʻmitasining 8-yigʻilishi doirasida Oʻzbekiston Respublikasi Kambagʻallikni qisqartirish va bandlik vazirligi hamda Xitoy Xalq Respublikasi Qishloq xoʻjaligi va qishloq ishlari vazirligi oʻrtasida muzokaralar oʻtkazildi.

Muzokaralar yakunida 2026–2027-yillarga moʻljallangan kambagʻallikni qisqartirish sohasida Qoʻshma harakatlar rejasi imzolandi.

Xitoy Xalq Respublikasi Qishloq xoʻjaligi va qishloq ishlari vaziri oʻrinbosari Chjan Chjili bilan oʻtkazilgan uchrashuvda quyidagi muhim kelishuvlarga erishildi:

Kambagʻallik va mehnat bozori tadqiqotlari instituti hamda Xitoy xalqaro kambagʻallikni qisqartirish markazi oʻrtasida hamkorlik memorandumini imzolash;

Oʻzbekistonda texnologiyalar transferi markazini tashkil etish;

Xitoy-FAO Maqsadli jamgʻarmasi doirasida “Janub-Janub” formatida qoʻshma demonstratsion loyihalarni amalga oshirish;

2026-yil may oyida Pekin shahrida boʻlib oʻtadigan yuqori darajadagi forumda Qoʻshma harakatlar rejasini amalga oshirish boʻyicha “Yoʻl xaritasi”ni tasdiqlash;

2026-yil oktabr oyida Sirdaryo viloyatida Oʻzbekiston–Xitoy kambagʻallikni qisqartirish forumini oʻtkazish.

Mazkur kelishuvlar aholi bandligini taʼminlash, zamonaviy tajribalarni joriy etish va kambagʻallikni qisqartirish sohasidagi hamkorlikni yanada mustahkamlashga xizmat qiladi.