Oʻzbekiston va Misr biznes aloqalarini kengaytirish masalalarini muhokama qilishdi

Toshkent, O’zbekiston (UzDaily.uz) — 13-iyun kuni Oʻzbekiston tashqi ishlar vaziri Baxtiyor Saidov Qohirada yetakchi Misr kompaniyalari rahbarlari va biznes vakillari bilan davra suhbati oʻtkazdi. Uchrashuv Misr sanoatchilari federatsiyasida boʻlib oʻtdi.

Tadbirda ACDIMA Group, Alexx-Performance, Bell Energy, DALTEX Co, EFC Plants, Elsewedy Electric, ORASCOM Construction, Seagull Petroleum and Mining, REDCON Construction, Travco Group va In2Metals kabi bir qancha yirik kompaniyalar vakillari ishtirok etdi.

Muhokamalar davomida Oʻzbekiston tomoni Misr sanoatchilari federatsiyasi raisi Muhammad Zaki El-Suvaydi bilan fikr almashdi. Asosiy eʼtibor ikki mamlakat tadbirkorlari oʻrtasidagi biznes aloqalarini kengaytirish, sanoat hamkorligini rivojlantirish va yangi investitsiya loyihalarini jalb qilishga qaratildi.

Tomonlar shuningdek, energetika, qurilish, farmatsevtika, qishloq xoʻjaligi, logistika va infratuzilma sohalarida hamkorlik istiqbollarini muhokama qilishdi.

Taʼkidlanishicha, Oʻzbekiston mamlakat bozorida oʻz ishtirokini kengaytirishdan manfaatdor boʻlgan misrlik investorlar va sanoat bizneslari uchun ochiq va ishonchli hamkor boʻlib qolmoqda.