Toşkent, Özbekiston (UzDaily.uz) — O‘zbekistonda pedagoglar va o‘quvchilar har yili psixologik diagnostikadan o‘tkaziladi, taʼlim sohasida yangi ilmiy-tadqiqot va maslahat tuzilmalari tashkil etiladi. Shuningdek, fuqarolar murojaatlarini qabul qilish uchun koll-markaz yo‘lga qo‘yiladi.
Tegishli chora-tadbirlar 2026 yil 19 oktyabrda qabul qilingan Prezident qarorlarida nazarda tutilgan.
Pedagoglar, tarbiyachilar, o‘quvchilar, tarbiyalanuvchilar va talabalar kamida har bir o‘quv yilida bir marta psixologik diagnostikadan o‘tkaziladi.
«Uzluksiz taʼlim tizimida psixologik xizmat sohasini ilmiy asosda rivojlantirish chora-tadbirlari to‘g‘risida»gi PQ-379-son qarorga muvofiq, ushbu tizim ikki bosqichda joriy etiladi.
2026/2027 o‘quv yilidan boshlab diagnostika maktabgacha taʼlim tashkilotlari va umumiy o‘rta taʼlim muassasalarida boshlanadi. 2027/2028 o‘quv yilidan esa u o‘rta maxsus, professional va oliy taʼlim muassasalariga ham tatbiq etiladi.
Nizomiy nomidagi O‘zbekiston milliy pedagogika universitetining O‘quv-ilmiy psixologiya markazi negizida Psixologiya ilmiy-tadqiqot instituti tashkil etiladi. U Taʼlim va fan vazirligi tasarrufiga o‘tkaziladi.
2027 yil 1 yanvardan institutda raqamli psixologiya va sunʼiy intellekt psixologiyasi, taʼlim psixologiyasi va psixologik xizmat, shuningdek, psixologik salomatlik va profilaktika laboratoriyalari faoliyati yo‘lga qo‘yiladi.
Diagnostika maxsus elektron platforma orqali o‘tkaziladi. Maʼlumotlarga ishlov berish jarayonida shaxsiy axborotning maxfiyligi taʼminlanishi shart.
Tekshiruv natijalari sunʼiy intellekt yordamida tahlil qilinadi. Shundan so‘ng ishtirokchilar uch guruhga ajratiladi: psixologik jihatdan barqaror shaxslar, psixologik yordamga muhtojlar va faol psixologik qo‘llab-quvvatlash talab etiladigan shaxslar.
Ikkinchi guruh vakillariga taʼlim tashkilotlarining psixologlari biriktiriladi. Faol psixologik yordamga muhtoj shaxslar bilan esa tegishli hududlardagi psixolog-mentorlar ishlaydi.
Qarorda mutaxassislarni rag‘batlantirish choralari ham belgilangan. Malaka oshirish bo‘yicha kaskad kurslariga o‘qituvchi sifatida jalb qilinadigan psixologlarga ushbu davrda asosiy ish joyidagi lavozim maoshiga nisbatan 20 foiz miqdorida ustama belgilanadi.
O‘quv yili davomida psixologik barqarorlikni taʼminlashda yuqori natijalarga erishgan 150 nafar psixolog-mentorga eng kam ish haqining 20 baravari miqdorida bir martalik mukofot beriladi. Taʼlim tashkilotlaridagi psixologik xizmat xodimlarining malakasini kamida har besh yilda bir marta oshirishi majburiy bo‘ladi.
Islohotlarning yana bir yo‘nalishi Taʼlim va fan vazirligi faoliyatini tashkil etish hamda aholi bilan hamkorlikni takomillashtirishga qaratilgan.
Vazirlikda autsorsing asosida fuqarolarning murojaatlari, shikoyatlari, takliflari va eʼtirozlarini qabul qilish, ularni tezkor ko‘rib chiqish hamda tegishli tashkilotlarga yo‘naltirish uchun koll-markaz tashkil etiladi. Shuningdek, aholi va taʼlim-fan sohasi xodimlari bilan doimiy muloqotni taʼminlash, taʼlim xizmatlarining sifati va ulardan foydalanish imkoniyatlari haqidagi maʼlumotlarni olish va tahlil qilish, mavjud muammolarni aniqlashga xizmat qiluvchi qayta aloqa tizimi joriy etiladi.
Taʼlim va fan vaziri huzurida Taʼlim masalalari bo‘yicha jamoatchilik kengashi tashkil etiladi. Uning tarkibiga o‘quvchilar, talabalar, ota-onalar, pedagoglar va ish beruvchilar vakillari kiritiladi.
Vazirlik hayʼati 15 nafar aʼzodan iborat bo‘ladi. Unga hayʼat raisi hisoblanadigan vazir, uning o‘rinbosarlari, vazirlik huzuridagi agentliklar rahbarlari, shuningdek, yetakchi oliy taʼlim muassasalari rektorlari, olimlar va pedagoglar kiradi.
2027 yil 1 fevralga qadar vazirga istisno tariqasida vazirlik markaziy apparatiga xodimlarni to‘g‘ridan-to‘g‘ri suhbat natijalari asosida ishga qabul qilish huquqi beriladi.
Bundan tashqari, Prezident Administratsiyasi huzurida Inson kapitalini va uzluksiz taʼlimni rivojlantirish strategiyasini ishlab chiqish bo‘yicha maxsus ishchi guruh tuziladi.
Taʼlim va fan vazirligi huzurida Inson kapitalini rivojlantirish jamg‘armasi hamda Taʼlim va fan sohasida strategik tadqiqotlar va baholash markazi tashkil etiladi.
Shu bilan birga, vazirlik huzurida Bilim va malaka ko‘nikmalarini baholash agentligi faoliyati yo‘lga qo‘yiladi.
Ayni paytda Maktabgacha va maktab taʼlimi vazirligi huzuridagi Taʼlimni rivojlantirish markazi faoliyati tugatiladi.
