Toşkent, Özbekiston (UzDaily.uz) — O‘zbekistonda oliy taʼlim tashkilotlari bitiruvchilarining ishga joylashish natijalarini baholashda qo‘llaniladigan «Bitiruvchilar sifati indeksi»ni hisoblash tartibi tasdiqlandi.
Tegishli idoraviy normativ hujjat Adliya vazirligi tomonidan 2026 yil 31 oktyabrda 3964-son bilan ro‘yxatdan o‘tkazildi.
Indeks hisobot yili yakunlari bo‘yicha to‘rtta ko‘rsatkich asosida hisoblanadi. Ular bitiruvchilarning ishga joylashish tezligi, barqaror bandlik darajasi, o‘rtacha oylik daromadi va bandlik toifasini o‘z ichiga oladi.
Hisobot davri 12 oyni — 1 iyuldan keyingi kalendar yilning 30 iyuniga qadar bo‘lgan muddatni qamrab oladi. Shu tariqa, baholashda nafaqat oliygohni tamomlagandan keyin ishga joylashish fakti, balki bitiruvchilarning keyingi bandlik ko‘rsatkichlari va daromadlari ham inobatga olinadi.
Ijtimoiy himoyaga muhtoj va Ijtimoiy reyestrga kiritilgan bitiruvchilar uchun alohida shartlar belgilangan.
Ularning ishga joylashish tezligi va bandlik toifasini hisoblashda eng yuqori koeffitsiyentlar qo‘llaniladi. Bundan tashqari, barqaror bandlik darajasini aniqlashda bunday bitiruvchilar barqaror ish bilan taʼminlangan deb hisoblanadi.
Agar bitiruvchi bir vaqtning o‘zida bir nechta bandlik toifasiga kirsa, tegishli ko‘rsatkichni hisoblashda belgilangan oshiruvchi koeffitsiyentlarning eng yuqorisi qo‘llaniladi.
Indeksni joriy etish O‘zbekiston Prezidentining 2026 yil 10 apreldagi PF-58-son farmonida nazarda tutilgan.
Hujjatda, shuningdek, eng yuqori natijalarni ko‘rsatgan 20 ta oliy taʼlim tashkilotining karyera markazlarini har yili moliyaviy rag‘batlantirish belgilangan.
Ushbu karyera markazlarining har biriga 500 million so‘mdan ajratiladi. Shu tariqa, yillik moliyalashtirishning umumiy hajmi 10 milliard so‘mni tashkil etadi: 20 ta tashkilotning har biriga 500 million so‘mdan.
