O‘zbekiston va Xitoy chorvachilik va urug‘chilik sohasida hamkorlikni kengaytiradi

Toshkent, O’zbekiston (UzDaily.uz) — O‘zbekiston va Xitoy qishloq xo‘jaligi sohasida, jumladan, chorvachilik, urug‘chilikni rivojlantirish va zamonaviy agrotexnologiyalarni joriy etish bo‘yicha hamkorlikni kengaytirish niyatida. Bu O‘zbekiston qishloq xo‘jaligi vaziri o‘rinbosari Jamshid Abduzuxurovning Xitoy Xalq Respublikasi Ichki Mo‘g‘uliston avtonom rayoni Bayannur shahri delegatsiyasi bilan uchrashuvi yakunlaridan maʼlum bo‘ldi.

Muzokaralar davomida tomonlar ikki tomonlama hamkorlikni kengaytirish, o‘zaro manfaatli loyihalarni amalga oshirish va qishloq xo‘jaligi sohasiga zamonaviy texnologiyalarni joriy etish masalalarini muhokama qildi.

Chorvachilikni rivojlantirishga alohida eʼtibor qaratildi. Ishtirokchilar zamonaviy naslchilik va seleksiya usullarini qo‘llash, chorva mollari mahsuldorligini oshirish, shuningdek, ilg‘or xorijiy tajribadan foydalanish imkoniyatlarini ko‘rib chiqdi.

Muhokamalarning yana bir yo‘nalishi urug‘chilik tizimini rivojlantirish bo‘ldi. Tomonlar mahalliy sharoitga moslashgan yuqori hosildor navlarni yaratish, sifatli urug‘lik materiallarini ishlab chiqarish va ushbu sohada zamonaviy texnologiyalarni joriy etish masalalarini ko‘rib chiqdi.

Uchrashuv ishtirokchilari, shuningdek, ilmiy va innovatsion ishlanmalarni qishloq xo‘jaligi amaliyotiga joriy etish masalalarini muhokama qildi. Xususan, raqamli texnologiyalardan foydalanish va zamonaviy ilmiy tadqiqotlar natijalarini ishlab chiqarish jarayonlari bilan integratsiya qilish masalalariga to‘xtalib o‘tildi.

Uchrashuv yakunlari bo‘yicha chorvachilik va urug‘chilik sohalarida ilmiy-texnologik hamkorlikni yana-da rivojlantirishning ustuvor yo‘nalishlari belgilandi.

Ular ilg‘or tajriba almashish, innovatsion yechimlarni joriy etish va qo‘shma loyihalarni amalga oshirishni nazarda tutadi.