Toshkent, O’zbekiston (UzDaily.uz) — O‘zbekiston investitsiyalar, sanoat va savdo vaziri Laziz Qudratov 6 oktyabr kuni Masdar kompaniyasining biznes va loyihalarni rivojlantirish bo‘yicha ijrochi direktori Abdulla Muhammad Abdulla Zoid bilan uchrashuv o‘tkazdi.
Tomonlar qayta tiklanuvchi energetika sohasida amalga oshirilayotgan loyihalar va yangi loyihalar istiqbolini muhokama qildi.
Muzokaralar davomida hamkorlikning joriy holati, shuningdek, Masdar kompaniyasining O‘zbekistondagi investitsiyaviy faoliyatini yana-da kengaytirish masalalari ko‘rib chiqildi.
Kompaniyaning mamlakatdagi portfeli qayta tiklanuvchi energetika sohasidagi to‘qqizta loyihani o‘z ichiga oladi. Ularning umumiy investitsiya hajmi 4,2 milliard dollar, umumiy quvvati esa 4,8 GVtni tashkil etadi.
Uchrashuvda quyosh energetikasi va energiyani saqlash tizimlari sohasidagi loyihalarni amalga oshirishni jadallashtirishga alohida eʼtibor qaratildi.
Tomonlar, shuningdek, ushbu yo‘nalishlarda yangi istiqbolli loyihalarni shakllantirish imkoniyatlarini ko‘rib chiqdi.
Uchrashuv yakunlari bo‘yicha qayta tiklanuvchi energetika sohasida hamkorlikni yana-da rivojlantirish va investitsiyaviy tashabbuslarni amaliy amalga oshirishga qiziqish bildirildi.
