O‘zbekiston BMT jinoyatchilik komissiyasiga saylandi

Toshkent, O‘zbekiston (UzDaily.uz) — Birlashgan Millatlar Tashkiloti shtab-kvartirasida, Nyu-York shahrida O‘zbekiston 2027–2029 yillar uchun BMTning Jinoyatchilikning oldini olish va jinoiy adolat komissiyasi tarkibiga saylandi. Bu haqda O‘zbekiston Tashqi ishlar vazirligi matbuot xizmati xabar qildi.

Komissiya 1992 yilda tashkil etilgan bo‘lib, uning qarorgohi Vena shahrida joylashgan.

Uning tarkibiga uch yillik muddatga saylanadigan 40 ta aʼzo davlat kiradi. Ushbu organ jinoiy adolat sohasida xalqaro standartlarni ishlab chiqish, transmilliy jinoyatchilik, korrupsiya va kiberjinoyatchilikka qarshi kurashish bo‘yicha saʼy-harakatlarni muvofiqlashtirish, shuningdek BMTning jinoyatchilikning oldini olishga bag‘ishlangan kongresslarini tashkil etish bilan shug‘ullanadi.

Qayd etilishicha, O‘zbekiston ilk bor Osiyo-Tinch okeani guruhi kvotasi bo‘yicha komissiya tarkibiga kirdi. Ushbu guruhda Xitoy, Yaponiya va Saudiya Arabistoni ham vakillik qiladi.

Mamlakatning mazkur organga saylanishi O‘zbekistonda qonun ustuvorligi, inson huquqlarini himoya qilish va sud-huquq tizimini modernizatsiya qilish sohasida amalga oshirilayotgan islohotlarni xalqaro hamjamiyat tomonidan eʼtirof etilishi sifatida baholanmoqda.

Tashqi ishlar vazirligi maʼlumotiga ko‘ra, O‘zbekiston nomzodining qo‘llab-quvvatlanishi BMTga aʼzo davlatlar tomonidan yuqori ishonch darajasini aks ettiradi hamda mamlakatning xalqaro nufuzi oshib borayotganini tasdiqlaydi.

Komissiyaga aʼzolik xalqaro standartlarni shakllantirishda ishtirok etish, xorijiy hamkorlar bilan hamkorlikni kengaytirish va milliy islohotlar tajribasini ilgari surish uchun qo‘shimcha imkoniyatlar yaratadi.

O‘zbekiston komissiya faoliyatida faol ishtirok etish niyatini bildirib, xalqaro hamkorlikni rivojlantirish, jinoiy siyosatni gumanizatsiya qilish tamoyillarini ilgari surish va jinoyatchilikning oldini olish bo‘yicha global saʼy-harakatlarni mustahkamlashga hissa qo‘shishini maʼlum qildi.