Namanganda SORA CAKE AND BAKERY korxonasi ishga tushdi
Toshkent, O’zbekiston (UzDaily.uz) — Namangan viloyati Davlatobod tumanida O‘zbekiston davlat mustaqilligining 35 yilligi arafasida SORA CAKE AND BAKERY brendiga qarashli yangi ishlab chiqarish korxonasi faoliyatini boshladi. Loyihaning investitsiya qiymati 10 mlrd so‘mni tashkil etadi. Bu haqda Davlatobod tumani hokimligi matbuot xizmati xabar berdi.
Korxona Davlatobod tumanidagi yoshlar kichik sanoat zonasi hududida joylashgan. Ishlab chiqarish jarayoniga Xitoy, Turkiya va Italiyadan yetkazib berilgan zamonaviy uskunalar o‘rnatilgan.
Kompaniya qandolat mahsulotlarining 30 dan ortiq turini ishlab chiqaradi. Korxonaning ishlab chiqarish quvvatlari yiliga 2 mlrd so‘mgacha qiymatda mahsulot ishlab chiqarish imkonini beradi.
Loyihani amalga oshirish doirasida yangi ish o‘rinlari yaratildi. Kelgusida korxonada 60 nafar kishini doimiy ish bilan taʼminlash rejalashtirilgan.
Korxonani rivojlantirishning yana bir yo‘nalishi xorijiy bozorlarga chiqish bo‘ladi. Istiqbolda kompaniya eksport hajmini taxminan 1 mln dollarga yetkazishni rejalashtirmoqda.
Korxonaning ochilish marosimida Namangan viloyati hokimi Shavkatjon Abdurazzoqov, katta avlod vakillari, tadbirkorlar, yoshlar va jamoatchilik ishtirok etdi.
Tadbir davomida ishtirokchilar ishlab chiqarish jarayoni va korxona faoliyati bilan tanishdilar, shuningdek, tadbirkorlar bilan uchrashuv o‘tkazdilar. Muhokama davomida ishlab chiqarish quvvatlarini yana-da kengaytirish bo‘yicha takliflar bildirildi.
Loyihaning amalga oshirilishi hududda ishlab chiqarishni rivojlantirish, yangi ish o‘rinlarini yaratish va Namangan viloyatining eksport salohiyatini oshirishga qaratilgan.
