Toshkent, O’zbekiston (UzDaily.uz) — Namangan viloyatining Yangiqo‘rg‘on tumanida SURA GENERAL INVESTMENTS qo‘shma korxonasining intensiv bog‘lari maydonini yana 200 gektarga kengaytirish rejalashtirilmoqda.
Loyihaning amalga oshirilishi meva yetishtirish hajmini oshirish va eksport tushumini 20 million dollarga yetkazish imkonini beradi. Bu haqda Yangiqo‘rg‘on tumani hokimligi axborot xizmati xabar berdi.
Ayni paytda korxona umumiy maydoni 267 gektar bo‘lgan intensiv bog‘larga ega. Ularda gilos, shaftoli, olxo‘ri va o‘rik yetishtirilmoqda. Korxona har yili xorijiy mamlakatlarga qariyb 1 200 tonna meva mahsulotlarini eksport qiladi.
Namangan viloyati hokimi Shavkatjon Abdurazzoqov korxonaning masʼul vakillari bilan uchrashuv o‘tkazdi. Unda korxona faoliyatini yana-da kengaytirish, ishlab chiqarish hajmini oshirish va eksportni ko‘paytirish istiqbollari muhokama qilindi.
Avvalroq korxona rahbari Aymen Abdelbari ishlab chiqarishni kengaytirish uchun qo‘shimcha 200 gektar yer maydoni ajratishni taklif qilgan edi. Bu taklif viloyat hokimi tomonidan qo‘llab-quvvatlandi.
Loyiha amalga oshirilishi natijasida mahsulotlar eksportini 20 million dollarga yetkazish va yuzlab yangi ish o‘rinlari yaratish kutilmoqda.
Ishlab chiqarishning kengaytirilishi Yangiqo‘rg‘on tumanida qishloq xo‘jaligini rivojlantirish, uning eksport salohiyatini oshirish hamda aholi bandligini taʼminlashga ham xizmat qilishi kutilmoqda.
