Ish beruvchilarga issiq havo sabab ish tartibini o‘zgartirish tavsiya etildi

Toshkent, O’zbekiston (UzDaily.uz) — Kambag‘allikni qisqartirish va bandlik vazirligi huzuridagi Davlat mehnat inspeksiyasi g‘ayrioddiy issiq havo munosabati bilan ochiq havoda mehnat qilayotgan xodimlar uchun mehnatni tashkil etish tartibini qayta ko‘rib chiqishni ish beruvchilarga tavsiya qildi.

Idorada taʼkidlanishicha, havo haroratining yuqori bo‘lishi issiqlik va quyosh urishi, organizmning suvsizlanishi hamda yurak-qon tomir kasalliklari asoratlari xavfini sezilarli darajada oshiradi. Inspeksiya xavfsiz mehnat sharoitlarini taʼminlash ish beruvchining majburiyati ekanini eslatdi.

Ish beruvchilarga imkoniyatdan kelib chiqqan holda ochiq havoda bajariladigan ishlar hajmini qisqartirish yoki ularni soat 11:00 dan 16:00 gacha bo‘lgan vaqt oralig‘ida vaqtincha to‘xtatib turish tavsiya etildi. Shuningdek, ushbu vaqtda og‘ir jismoniy mehnat bilan bog‘liq ishlardan voz kechish taklif qilindi.

Bundan tashqari, ish beruvchilarga xodimlarni yetarli miqdorda ichimlik suvi bilan taʼminlash, soya yoki salqin xonalarda dam olish joylarini tashkil etish hamda muntazam tanaffus qilish imkoniyatini yaratish tavsiya qilindi.

Inspeksiya tibbiy ko‘rikdan o‘tmagan xodimlarni ishga qo‘ymaslikni ham tavsiya etdi. Ochiq havoda ishlaydigan xodimlar uchun havo o‘tkazuvchi kiyimlar va quyosh nurlaridan himoya qiluvchi bosh kiyimlar nazarda tutilishi lozim.

Shuningdek, issiqlik urishining alomatlarini aniqlash va xodimning ahvoli yomonlashganda birinchi tibbiy yordam ko‘rsatish tartibi bo‘yicha yo‘riqnomalar o‘tkazishga alohida eʼtibor qaratish tavsiya etildi.

Avvalroq “O‘zgidromet” 13–17 iyul kunlari O‘zbekiston hududiga janubdan juda issiq havo oqimi kirib kelishini maʼlum qilgan edi. Prognozlarga ko‘ra, kunduzi havo harorati plyus 41–43 darajagacha, shimoliy, janubiy va cho‘l hududlarida esa plyus 44–46 darajagacha ko‘tarilishi kutilmoqda.

G‘ayrioddiy issiq havo fonida mamlakatning qator hududlarida vaqtinchalik cheklovlar joriy etildi. Surxondaryo va Qashqadaryo viloyatlarida yuk transporti harakati cheklandi. Xorazm va Navoiy viloyatlari, shuningdek, Qoraqalpog‘istonda ayrim bolalar bog‘chalari faoliyati vaqtincha to‘xtatildi. 15 iyuldan boshlab Toshkent metropolitenining yer usti uchastkalarida poyezdlar harakati tezligi soatiga 60 kilometrdan 40 kilometrgacha pasaytirildi.