Toshkent, O’zbekiston (UzDaily.uz) — Andijonda avtomobilga metan yoqilg‘isi quyish jarayonida avtomobil gaz to‘ldirish kompressor stansiyasida (AGTKS) gaz balloni portladi. Hodisa 5 sentyabr kuni soat taxminan 11:15 da “Andijon” mahallasida sodir bo‘lgan.
Dastlabki maʼlumotlarga ko‘ra, “Spark” avtomobiliga o‘rnatilgan ballon portlagan. Avtomobilning asosiy shikastlangan qismi gaz jihozlari joylashgan orqa qismi bo‘lgan.
Hodisadan so‘ng voqea joyiga tezkor xizmatlar yetib kelgan. Ular hodisa oqibatlarini bartaraf etish uchun zarur choralarni ko‘rgan.
Portlashdan so‘ng gaz to‘ldirish stansiyasi hududida yong‘in sodir bo‘lmagan. Mavjud maʼlumotlarga ko‘ra, hodisa oqibatida fuqarolardan hech kim jabrlanmagan.
