Тошкент, Ўзбекистон (UzDaily.uz) — Uzbekistan Airports ўзининг илк еврооблигацияларини чиқаришга тайёргарлик кўрмоқда. Давлат компанияси раиси Жавлонбек Умарходжаев 20 март куни бўлиб ўтган матбуот анжуманида маълум қилишича, Президент Uzbekistan Airports’га 2025 йил охирига қадар 100 миллион долларлик еврооблигациялар жойлаштиришни топширган.

Бу вазифани амалга ошириш мақсадида ўтган ҳафта компаниянинг трансформация бўйича раҳбар ўринбосари Европада музокаралар ўтказган. Март ойида Uzbekistan Airports халқаро рейтинг агентлиги билан шартнома имзолади ва биринчи кредит рейтинги май ойи ўрталарда эълон қилиниши кутилмоқда. Кейинчалик иккинчи рейтинг агентлиги ҳам бу баҳони тасдиқлаши керак. Компаниянинг оптимистик прогнозларига кўра, еврооблигациялар ноябрь ойига қадар жойлаштирилиши мумкин.

Тушган маблағлар аэропортларни реконструкция қилишга йўналтирилади. Жумладан, Тошкент халқаро аэропортида янги юк терминали қурилиши режалаштирилган.

Аввалроқ, 16 январь куни, Президент Шавкат Мирзиёев транспорт соҳасини ривожлантириш учун 400 миллион доллар жалб қилишни топширган эди. Шу жумладан, 100 миллион доллар Uzbekistan Airways учун ажратилган. Миллий авиакомпания яқин ойларда Deutsche Bank билан молиялаштириш тўғрисидаги келишувни имзолашни режалаштирмоқда.