Тошкент, Ўзбекистон (UzDaily.uz) — Ўзбекистон Президенти Администрацияси раҳбари Саида Мирзиёева Парижда Франция президенти Эммануэль Макрон билан учрашиб, икки томонлама ҳамкорликни кенгайтириш истиқболларини муҳокама қилди. Бу ҳақда у ўзининг Telegram-каналида маълум қилди.
Саида Мирзиёеванинг сўзларига кўра, учрашув давомида у Франция раҳбарига Ўзбекистон президенти Шавкат Мирзиёевнинг саломларини етказган.
Томонлар стратегик шериклик истиқболларини, жумладан, мудофаа, хавфсизлик, кибертехнологиялар ва сунъий интеллект соҳаларидаги ҳамкорликни, шунингдек, йирик иқтисодий ва гуманитар лойиҳаларни амалга ошириш масалаларини муҳокама қилган.
Бундан ташқари, Саида Мирзиёева Париж тинчлик форумидаги иштироки ҳақида ҳам сўзлаб берди. Унинг таъкидлашича, тадбирда болаларни ҳимоя қилиш масалалари ҳамда аввал Самарқандда кўтарилган мавзулар муҳокама қилинган.
У ҳар бир бола қаерда туғилгани ва оилавий шароитидан қатъи назар, таълим олиш, хавфсиз муҳитда улғайиш ва келажакда ўз имкониятларини рўёбга чиқариш имкониятига эга бўлиши муҳимлигини таъкидлади.
