Тошкент, Ўзбекистон (UzDaily.uz) — Тошкент шаҳрида 2027 йилда пойтахт аҳолисининг хонадонларига «ақлли» сув ҳисоблагичларини ўрнатиш режалари келишиб олинди. Келгуси йилдаги ишларнинг асосий мезони сув таъминоти балансини шакллантириш бўлади. Ҳисоблагичлар ўрнатиладиган туманлар аллақачон белгиланган.
Режалар Тошкент шаҳар ҳокимининг ўринбосари О. Мўминов раҳбарлигида «Технопарк» МЧЖ ва Франциянинг SUEZ International SAS компанияси вакиллари иштирокида ўтказилган ишчи учрашувда муҳокама қилинди. Бу ҳақда Тошкент шаҳар ҳокимлиги хабар берди.
Учрашув иштирокчилари ишларни босқичма-босқич ва тизимли равишда амалга ошириш, шунингдек, масъул ташкилотлар ўртасидаги ҳамкорликни мувофиқлаштиришга келишиб олди.
2026 йил бошидан буён Сергели, Яккасарой, Чилонзор, Учтепа ва Янгихаёт туманлари аҳолисига 190 мингдан ортиқ «ақлли» сув ҳисоблагичлари бепул ўрнатилди.
Ҳокимлик маълумотларига кўра, ушбу чора-тадбирлар ичимлик суви истеъмолини аниқ ва шаффоф ҳисобга олиш ҳамда сув ресурсларидан оқилона фойдаланишни таъминлайди.
Шунингдек, улар ҳисоб-китобларнинг ишончлилигини ошириш ва пойтахтнинг сув таъминоти тизимини рақамлаштириш ишларини давом эттириш имконини беради.
