Тошкент, Ўзбекистон (UzDaily.uz) — 2026 йил январь–август ойларида Ўзбекистонда бозор хизматлари ҳажми 908,5 триллион сўмни ташкил этди. Бу ўтган йилнинг шу даврига нисбатан 17 фоизга кўпдир.
2026 йил якуни бўйича хизматлар бозорининг ўсиш суръатини 114,5 фоизга етказиш мақсад қилиб белгиланган. Бу ҳақда Ўзбекистон Республикаси Иқтисодиёт ва молия вазирлиги маълум қилди.
Энг юқори ўсиш молиявий хизматларда қайд этилди — 22,5 фоиз. Иккинчи ўринни алоқа ва ахборотлаштириш хизматлари 21,2 фоизлик ўсиш билан эгаллади. Таълим хизматлари эса 19,4 фоизга ўсиб, учинчи ўринни қайд этди.
Ҳудудлар орасида энг юқори ўсиш суръати Навоий вилоятида кузатилди — 118,5 фоиз. Кейинги ўринларда Тошкент шаҳри — 118,4 фоиз ва Сирдарё вилояти — 117,7 фоиз қайд этилди. Хоразм, Сурхондарё, Жиззах ва Андижон вилоятларида ўсиш кўрсаткичи 117,6 фоизни ташкил этди.
Вазирлик ҳудудларда сервис инфратузилмасини ривожлантириш бўйича амалга оширилаётган ишлар ҳақида ҳам маълумот берди. Ҳозирга қадар марказий кўчаларда 1,7 мингдан ортиқ савдо ва хизмат кўрсатиш объекти ишга туширилган. 2026 йил охирига қадар яна 1 431 та объектни очиш режалаштирилган.
«Янги Ўзбекистон» массивларида ва халқаро автомобиль йўллари бўйлаб 828 та сервис объекти фаолият бошлади. Йил охирига қадар ушбу ҳудудларда яна 245 та объектни ишга тушириш режалаштирилган. Шунингдек, 300 та ер участкаси аукцион савдоларига чиқарилган.
Президентнинг 2026 йил 5 февралдаги ПҚ-49-сон қарорига мувофиқ, республика бюджетидан қўшимча равишда 1,65 триллион сўм ажратилди.
Маблағлар гавжум кўчалар, сув бўйи ва йўл бўйидаги ҳудудлар, шунингдек, туристик салоҳияти юқори бўлган маҳаллалар инфратузилмасини ривожлантиришга йўналтирилди.
Хизмат кўрсатиш соҳасида тадбиркорлик инфратузилмасини ривожлантиришга қаратилган 358 та лойиҳа амалга оширилмоқда. Шунингдек, 33,8 гектар ер майдонини аукцион савдоларига чиқариш режалаштирилган.
Лойиҳаларнинг лойиҳа-смета ҳужжатлари ишлаб чиқилган, қурилиш-монтаж ишлари эса давом этмоқда.
Лойиҳалар амалга оширилиши натижасида 5 265 та янги тадбиркорлик субъектини ташкил этиш ва яна 2 502 та фаолият юритаётган корхона ишини кенгайтириш кутилмоқда. Шунингдек, 20 427 та янги иш ўрни яратиш режалаштирилган.
Ушбу ишлар «Ўзбекистон — 2030» стратегияси доирасида олиб борилмоқда.
