Тошкент, Ўзбекистон (UzDaily.uz) — Тошкент халқаро аэропортида SKYSERV компанияси Visa ва DragonPass билан ҳамкорликда ташкил этган янги Visa Lounge бизнес-зали иш бошлади. Бу ҳақда Uzbekistan Airports хабар берди.
Янги зал собиқ Anor бизнес-залини реконструкция қилиш натижасида ташкил этилди. Электрон E-auksion платформасида ўтказилган очиқ савдолардан сўнг ушбу макон оператори этиб SKYSERV компанияси танланган. Реконструкция жараёнида объект майдони деярли икки бараварга кенгайтирилди, унинг режаси, дизайни ва концепцияси тўлиқ янгиланди. Кейинги босқичда лойиҳага халқаро ҳамкорлар — Visa ва DragonPass қўшилди.
Янги Visa Lounge зали майдони 651 квадрат метрни ташкил этади. Бир вақтнинг ўзида бу ерда 150 нафаргача йўловчи бўлиши мумкин.
Зал инфратузилмаси дам олиш ва ишлаш учун мўлжалланган бир нечта ҳудудларни ўз ичига олади. Йўловчилар учун эргономик креслолар билан жиҳозланган жойлар, ишлаш ҳудуди, хусусий ва тинч зоналар, ухлаш капсулалари, мини-кинотеатр ҳамда индивидуал душ хоналари ташкил этилган.
Болали йўловчилар учун алоҳида ўйин хонаси мавжуд. Шунингдек, залда чекиш учун изоляция қилинган ҳудуд жиҳозланган.
Меҳмонларга турли таомлар ва газаклар, шунингдек, кенг турдаги ичимликлар таклиф этилади.
DragonPass билан ҳамкорлик туфайли халқаро дастур иштирокчилари белгиланган хизмат кўрсатиш шартларига мувофиқ Visa Lounge залидан фойдаланишлари мумкин.
Зал Oman Air, Etihad Airways, Aeroflot ва Azerbaijan Airlines каби қатор халқаро авиакомпаниялар йўловчиларига ҳам хизмат кўрсатади. Ушбу авиакомпаниялар мижозларига залдан фойдаланиш имконияти авиакомпаниялар билан амалдаги шартлар ва келишувларга мувофиқ тақдим этилади.
«Тошкент халқаро аэропорти учун инфратузилмани ривожлантириш йўловчиларга хизмат кўрсатиш сифатининг яхшиланиши билан бирга бориши муҳим. Реконструкциядан сўнг биз замонавий қулайлик талабларига жавоб берадиган, кенгроқ ва функционал маконга эга бўлдик. Visa Lounge аэропорт сервис инфратузилмасининг муҳим қисмига айланишига ишонаман», — дея маълум қилди Uzbekistan Airports.
Янги бизнес-залнинг очилиши Тошкент халқаро аэропорти йўловчи инфратузилмасини ривожлантиришнинг навбатдаги босқичи бўлиб, парвоздан олдин йўловчиларнинг қулай вақт ўтказиш имкониятларини кенгайтирди.
