Тошкент, Ўзбекистон (UzDaily.uz) — Ўзбекистондан 13 нафар ҳунарманд 1–4 октябрь кунлари Истанбул шаҳрида бўлиб ўтган «Craft Istanbul 2026» халқаро кўргазмасида иштирок этди.
Ўзбекистонлик усталар миллий амалий безак санъати намуналарини тақдим этиб, хорижлик меҳмонларни ҳунармандчилик анъаналари билан таништирди.
Кўргазмада кулолчилик, каштачилик, заргарлик санъати ва миллий тўқимачилик каби турли йўналишларда тайёрланган ишлар намойиш этилди.
Ўзбекистонлик ҳунармандларнинг иштирокидан кўзланган мақсад миллий ҳунармандчилик анъаналарини хорижда тарғиб қилиш, маҳаллий усталар ишларини халқаро аудиторияга тақдим этиш ва янги ҳамкорлик алоқаларини ўрнатишдан иборат бўлди.
Кўргазма, шунингдек, ўзбек усталарининг анъанавий миллий мерос ва замонавий ижодий ёндашувлар уйғунлигини намойиш этиши учун майдон вазифасини ўтади.
