Тошкент, Ўзбекистон (UzDaily.uz) — Ўзбекистон ва Туркия ўзаро савдо ҳажмини ошириш, савдо тўсиқларини бартараф этиш ҳамда икки мамлакат бозорларига товарларнинг кириб бориш шартларини такомиллаштириш бўйича ишларни давом эттиришга келишиб олди.
Тегишли масалалар Анқара шаҳрида бўлиб ўтган Ўзбекистон — Туркия савдо бўйича ишчи гуруҳининг иккинчи йиғилишида кўриб чиқилди.
Ўзбекистон делегациясига Инвестициялар, саноат ва савдо вазирлиги департаменти бошлиғи Иномжон Абдураҳмонов раҳбарлик қилди. Туркия томонидан эса Туркия Савдо вазирлиги департаменти бошлиғи Ҳюсню Дилемре иштирок этди.
Музокараларнинг асосий мавзуларидан бири ўзаро савдо ҳажмини 5 миллиард долларга етказиш бўйича белгиланган мақсадга эришиш бўлди. Учрашув иштирокчилари тариф ва нотариф чекловларни бартараф этиш, шунингдек, қишлоқ хўжалиги маҳсулотлари, электротехника буюмлари ва енгил саноат товарларининг икки мамлакат бозорларига кириш имкониятларини кенгайтириш чораларини муҳокама қилди.
Техник тартибга солиш ва стандартлаштириш, мувофиқлик сертификатларини ўзаро тан олиш ҳамда божхона тартиб-таомилларини соддалаштириш масалаларига ҳам алоҳида эътибор қаратилди. Томонлар электротехника маҳсулотлари савдоси масалалари бўйича техник ишчи гуруҳ тузишга келишиб олди.
Бундан ташқари, иштирокчилар икки мамлакат экспортчилари учун қўшимча имкониятлар яратишга қаратилган Преференциал савдо тўғрисидаги битимни кенгайтириш масаласи бўйича маслаҳатлашувлар ўтказди.
Йиғилиш якунида тегишли протокол имзоланди.
Шунингдек, томонлар Туркий давлатлар ташкилотининг Анқарада бўлиб ўтадиган навбатдаги саммити доирасида битимни кенгайтириш тўғрисидаги ҳужжатни имзолаш масаласини ишлаб чиқишга келишиб олди.
