Тошкент, Ўзбекистон (UzDaily.uz) — Ўзбекистон Давлат хавфсизлик хизмати маълум қилишича, Тошкент шаҳрида Хитойдан қарийб 25 килограмм кучли таъсир қилувчи прегабалин моддасини олиб киришга уринишнинг олди олинди.
Тезкор тадбир ДХХ ходимлари томонидан «Тошкент-АЭРО» ихтисослаштирилган божхона комплекси контрабандага қарши курашиш бўлинмаси билан ҳамкорликда ўтказилди.
Икки нафар эркак Тошкентдаги курьерлик компанияси офисида Хитойдан юборилган жўнатмани қабул қилиб олаётган вақтда қўлга олинди.
Улардан бири 2000 йилда туғилган, Юнусобод туманида яшовчи шахс бўлган. Иккинчиси эса 1998 йилда Фарғона вилоятида туғилган ва вақтинча Чилонзор туманида истиқомат қилган.
Жўнатма очиб текширилганда, унинг ичидан оқ кукун кўринишидаги 24 килограмм 974 грамм прегабалин моддаси аниқланди.
Қўлга олинган шахсларга нисбатан Ўзбекистон Республикаси Жиноят кодексининг 246-моддаси 1-қисми билан жиноят иши қўзғатилди.
Уларга нисбатан эҳтиёт чораси сифатида қамоққа олиш белгиланди.
Тергов ҳаракатлари давом этмоқда.
