Тошкент, Ўзбекистон (UzDaily.uz) — Ўзбекистон Бош вазирининг биринчи ўринбосари — олий таълим, фан ва инновациялар вазири Эркинжон Турдимов олий таълим соҳаси раҳбарларининг тизимнинг жорий ҳолати, амалга оширилаётган ислоҳотлар ва истиқболдаги вазифаларга бағишланган тақдимотлари билан танишди.
Асосий устувор йўналишлардан бири сифатида олий таълим муассасаларида таълим сифатини ошириш ва ўқув дастурларини меҳнат бозори эҳтиёжларига мослаштириш белгиланди. Талабалар олган билимларини амалиётда қўллай олиши ва танлаган касбини ишонч билан эгаллаши учун илм-фан билан ишлаб чиқариш ўртасидаги алоқаларни мустаҳкамлашга алоҳида эътибор қаратилди.
Учрашув иштирокчилари талабалар учун қулай шароитлар яратиш, мутахассислик фанлари ва хорижий тилларни чуқур ўрганиш, шунингдек, битирувчиларнинг ишга жойлашишига кўмаклашиш масалаларини ҳам муҳокама қилдилар.
Бошқа муҳим йўналишлар қаторида университетларнинг илмий салоҳиятини ривожлантириш, профессор-ўқитувчиларни қўллаб-қувватлаш, илмий ишланмаларни иқтисодиётнинг реал секторига жорий этиш ва халқаро ҳамкорликни кенгайтириш масалалари ҳам қайд этилди.
Тақдимотлар якунлари бўйича олий таълим тизимини фақат диплом беришга эмас, балки мустақил фикрлайдиган, чуқур билимга ва мустаҳкам касбий кўникмаларга эга ёш мутахассисларни тайёрлашга йўналтириш зарурлиги таъкидланди.
Эркинжон Турдимов мавжуд муаммоларни таҳлил қилиш, уларни ҳал этиш бўйича аниқ чора-тадбирларни белгилаш ва ҳар бир устувор йўналиш бўйича амалий натижаларга эришиш муҳимлигини қайд этди.
