Тошкент, Ўзбекистон (UzDaily.uz) — Тошкент шаҳар транспорт ва йўл-транспорт инфратузилмасини ривожлантириш бош бошқармаси шаҳар автобусларида йўл ҳақи тўланганини назорат қилиш вақтида валидаторларни вақтинча блоклаш тартибини тушунтирди.
Тушунтириш ижтимоий тармоқларда қурилмаларнинг вақтинча блоклангани ҳақида тарқалган маълумотлар муносабати билан эълон қилинди.
Вазирлар Маҳкамасининг 2026 йил 3 июндаги 276-сон қарорига мувофиқ, 1 сентябрдан автоматлаштирилган йўл ҳақини тўлаш тизими билан жиҳозланган шаҳар автобусларида йўловчилар автобусга кириш вақтида йўл ҳақини тўлашлари шарт.
Имтиёзли ёки бепул йўл ҳақида юриш ҳуқуқига эга бўлган йўловчилар ушбу ҳуқуқни белгиланган тартибда тасдиқлашлари керак.
Транспорт бошқармасида таъкидланишича, валидаторларни вақтинча блоклаш мазкур талабларга риоя этилишини назорат қилиш доирасида қўлланилади.
Ушбу чора тўлов интизоми ва йўл ҳақини тўлаш маданиятини ошириш, шунингдек, йўл ҳақини ўз вақтида тўлаш кўникмасини шакллантиришга қаратилган.
Валидаторларни вақтинча блоклаш тартиби транспорт вазирининг 2026 йил 16 январдаги 14-сон буйруғи билан тасдиқланган Йўриқномада белгиланган.
Вазирлик таъкидлашича, вақтинча блоклашнинг асосий мақсади йўловчиларни жаримавий жавобгарликка тортиш эмас, балки автобусга кириш вақтида йўл ҳақини тўлаш талабига риоя этилишини таъминлаш ва тўлов маданиятини оширишдан иборат.
Шу билан бирга, валидаторларнинг соз ишлашини таъминлаш, йўловчиларнинг қурилмалардан эркин фойдаланиши ва йўл ҳақини тўлаш учун янада қулай шароитлар яратишга оид таклифлар инобатга олинади.
