Иқтисод

Энергетиклар L-503 электр узатиш тармоғини таъмирлашни кечаю кундуз давом эттирмоқда

Энергетиклар L-503 электр узатиш тармоғини таъмирлашни кечаю кундуз давом эттирмоқда
Энергетиклар L-503 электр узатиш тармоғини таъмирлашни кечаю кундуз давом эттирмоқда / Фото: Видеодан кадр.

Тошкент, Ўзбекистон (UzDaily.uz) — Фарғона водийсида электр таъминотида узилишларга сабаб бўлган 500 кВ кучланишли L-503 электр узатиш тармоғида тиклаш ишлари кечаю кундуз давом этмоқда. Бу ҳақда Ўзбекистон Энергетика вазирлиги хабар берди.

Вазирлик маълумотига кўра, ноқулай об-ҳаво шароити ва кучли шамолга қарамай, энергетиклар авария оқибатларини бартараф этиш устида ишламоқда.

Тожикистон ҳудудидан ўтувчи электр узатиш тармоғини тиклаш ишларига «Ўзбекистон миллий электр тармоқлари» АЖ ҳамда Тожикистоннинг ихтисослашган ташкилотлари мутахассислари жалб қилинган.

Энергетика вазирлиги таъкидлашича, ишлар узлуксиз давом эттирилади. Идора тиклаш жараёни ҳақида қўшимча маълумотларни улар олинган сари тақдим этишни ваъда қилган.

L-503 тармоғида авариявий ўчиш 19 ноябрь куни соат 06:19 да содир бўлган. 500 кВ кучланишли ушбу тармоқ Сирдарё иссиқлик электр станциясидан Фарғона водийси ҳудудларига электр энергиясини узатишни таъминлайди.

Дастлабки маълумотларга кўра, ноқулай об-ҳаво шароити сабабли мураккаб рельефли адирлик ҳудудда жойлашган тармоқ таянчларидан бири қулаб тушган. Шундан сўнг автоматик ҳимоя тизими ишга тушиб, L-503 орқали электр энергиясини узатиш тўхтаган.

Авария айрим истеъмолчиларнинг электр таъминотида узилишларга сабаб бўлди. Тиклаш ишлари якунлангунига қадар Фарғона водийсининг айрим ҳудудларида электр энергияси етказиб бериш вақтинча чекланган.

Фарғона вилояти, шунингдек, 500 кВ кучланишли L-524 тармоғи орқали ҳам электр энергияси олади. Ушбу тармоқ Янги Ангрен иссиқлик электр станциясидан электр энергиясини узатишни таъминлайди.

 

Дилафруз Ниязова
Дилафруз Ниязова

Дилафруз Ниязова 2025 йилдан буён UzDaily жамоасида фаолият юритиб, нашрнинг ўзбек тилидаги версияси учун масъулдир.