Тошкент, Ўзбекистон (UzDaily.uz) — Ўзбекистонда иссиқлик энергиясини ишлаб чиқариш ва етказиб бериш харажатларини 30–40 фоизга камайтириш кўзда тутилмоқда.
Бунга марказлашган иссиқлик таъминоти тизимини янгилаш ва тармоқлардаги йўқотишларни қисқартириш орқали эришиш режалаштирилган. Бу ҳақда 14 октябрь куни нефть-газ соҳасига масъул бўлган иқтисодиёт ва молия вазири ўринбосари Хуршед Мустафаев маълум қилди.
Вазирлик вакили сўзларига кўра, тарифларни хизмат кўрсатишнинг ҳақиқий харажатларига яқинлаштиришнинг ягона усули сифатида нархларни ошириш кўриб чиқилмаяпти.
Вазирлар Маҳкамаси қарори лойиҳасида иссиқлик энергиясининг таннархини ҳар йили камида 15 фоизга камайтиришни назарда тутувчи алоҳида дастур ишлаб чиқиш таклиф этилган.
Дастлабки босқичлардан бири амалдаги иссиқлик таъминоти тизимини техник аудитдан ўтказиш бўлади. Унинг натижалари асосида инфратузилмани модернизация қилиш ва иссиқлик йўқотишларини камайтириш бўйича зарур чора-тадбирлар белгиланиши режалаштирилган.
«Таннарх фақат ошиб борадиган кўрсаткич эмас. Компания тегишли вазирлик ва идоралар билан биргаликда уни камайтириш бўйича иш олиб боради», — деди Мустафаев.
Ҳужжат лойиҳасида аҳоли учун тарифларни ўзгартиришнинг таклиф этилаётган тартиби ҳам белгиланган. 2028 йилдан бошлаб тарифлар йилда бир марта — 1 майдан эътиборан, йиллик инфляцияни ҳисобга олган ҳолда қайта кўриб чиқилиши мумкин. Бунда ҳар йилги индексация 10 фоиздан ошмаслиги керак.
Шунингдек, 2026 йил 1 ноябрдан бошлаб янги тарифларни жорий этиш ҳам назарда тутилган. Қарор лойиҳасининг жамоатчилик муҳокамаси 28 октябрь куни якунланади.
Пасайтирилган тарифларни 2030 йилга қадар босқичма-босқич таннархга яқинлаштириш режаси аввалроқ, 2025 йил 11 мартдаги Президент қарори билан мустаҳкамланган эди.
Ўзгаришлар доирасида иссиқлик таъминоти инфратузилмасини янгилаш, 2027 йил якунига қадар тармоқлардаги йўқотишларни 25 фоизга қисқартириш ва соҳа корхоналарида замонавий биллинг тизимларини жорий этиш ҳам кўзда тутилган.
