Тошкент, Ўзбекистон (UzDaily.uz) — Ўзбекистоннинг Сирдарё вилояти Японияда ишга жойлаштириш учун мутахассислар тайёрлайди. Вилоят ҳокимлиги ва Япониянинг Onodera User Run компанияси ўртасида тегишли меморандум имзоланди. Бу ҳақда Сирдарё вилояти ҳокимлиги хабар берди.
Вилоят ҳокими вазифасини бажарувчи Донёр Қодиров Onodera User Run компанияси раҳбари Дзюн Като билан учрашди. Компания мутахассисларни касбий тайёрлаш ва уларни Япониядаги корхона ҳамда ташкилотларга ишга жойлаштириш билан шуғулланади.
Мавжуд маълумотларга кўра, ҳозирда Ўзбекистондаги 16 та Япония компанияси малакали кадрларга эҳтиёж борлигини билдирган. Келаси йили мамлакатга яна бир неча ўнлаб Япония компаниялари келиши кутилмоқда. Тахминларга кўра, уларга минглаб мутахассислар керак бўлади.
Учрашувда Қодиров техникумларда касбий таълимни япон тилини ўрганиш билан биргаликда олиб бориш зарурлигини таъкидлади. Шунингдек, ўқув дастурларини ишлаб чиқишда хорижий иш берувчиларнинг буюртмаларини ҳисобга олишни таклиф қилди.
Томонлар иш берувчилар билан аниқ келишувлар асосида тиббиёт, ҳайдовчилик хизматлари, логистика ва саноат соҳалари учун кадрлар тайёрлаш масаласига ҳам алоҳида эътибор қаратди.
Музокаралар якунида Сирдарё вилояти ҳокимлиги ва Onodera User Run компанияси ўртасида ҳамкорлик меморандуми имзоланди.