Тошкент, Ўзбекистон (UzDaily.uz) — Тошкент ҳокими Шавкат Умурзаков бошчилигидаги пойтахт делегацияси Сиэтл шаҳрида қатор ишчи учрашувлар ўтказиб, инвестиция лойиҳалари, технологик ва маданий ҳамкорлик масалаларини муҳокама қилди. Бу ҳақда Тошкент шаҳар ҳокимлиги хабар берди.
Rainier Club’да Greater Seattle Partners президенти ва ижрочи директори Шеннон Брэддок ҳамда 20 га яқин компания вакиллари иштирокида давра суҳбати бўлиб ўтди. Унда Тошкент билан ҳамкорлик қилиш имкониятлари кўриб чиқилди, таклифлар алмашилди ва бизнес вакилларининг шаҳар лойиҳаларида иштирок этиш истиқболлари муҳокама қилинди.
Gulf Petrocas Energy Group вакиллари Вано Накаидзе ва Крейг Крамер билан учрашув якунлари бўйича томонлар ҳамкорлик меморандумини имзолади. Ҳужжат Тошкентда Gulf бренди остида автомобиль ёқилғи қуйиш шохобчалари тармоғини ташкил этиш лойиҳасини қамраб олади.
Шунингдек, делегация Amazon Web Services (AWS) вакиллари билан ҳамкорлик йўналишларини муҳокама қилди ва биргаликдаги ишларнинг кейинги босқичларини белгилаб олди.
Сиэтл халқаро кинофестивали (SIFF) бадиий раҳбари Бет Барретт билан учрашувда йирик кинофестивалларни ташкил этиш тажрибаси, профессионал тажриба алмашиш имкониятлари ҳамда Тошкентда фестиваль саноатини ривожлантириш учун мутахассисларни жалб қилиш масалалари кўриб чиқилди.
Бутунжаҳон рақамли технологиялар академияси ижрочи раиси Йель Ли билан ҳамкорлик меморандуми имзоланди. Томонлар ҳамкорликнинг кейинги йўналишларини, жумладан, 2027 йилда Тошкентда Бутунжаҳон рақамли конференциясини ўтказиш имкониятини муҳокама қилди. Академия вакиллари Ўзбекистон пойтахтига ташриф буюришга таклиф этилди.
«Сиэтл — Тошкент» қардош шаҳарлар алоқалари ассоциацияси раҳбарияти билан ҳам алоҳида учрашув бўлиб ўтди. Унда шаҳарлар ўртасидаги алоқаларни мустаҳкамлаш, маданий алмашинувни ривожлантириш ва қўшма ташаббусларни амалга ошириш бўйича таклифлар алмашилди.
Делегация Вашингтон штатида истиқомат қилаётган ватандошлар билан ҳам учрашди. Улар ўз фаолияти ҳақида сўзлаб берди, касбий тажрибаси билан ўртоқлашди ҳамда Тошкент ва Ўзбекистон учун фойдали бўлиши мумкин бўлган ғояларни тақдим этди.
Муҳокамалар давомида тиббиёт ва рақамли технологиялар соҳаларида ҳамкорликни ривожлантириш бўйича таклифлар билдирилди. Азиза Мирсаидова шахсий маълумотларни сақлаш стандартларини жорий этиш бўйича ечимларни тақдим этди ва киберхавфсизлик соҳасидаги ҳамкорликни ривожлантиришни таклиф қилди.
Хусусан, у ахборот сизиб чиқишининг олдини олиш, киберҳужумлардан ҳимояланиш ва сунъий интеллект асосидаги хизматлар хавфсизлигини таъминлаш масалаларига эътибор қаратди.
Учрашувнинг 17 ёшли иштирокчиси Ясмина ватандошларнинг мулоқот қилиши ва бир-бири билан танишиши учун ягона интернет платформасини яратишни таклиф қилди. Унинг ғоясига кўра, мазкур ресурс фойдаланувчиларга ўзбек маданияти ҳақида кўпроқ маълумот олишда ҳам ёрдам бериши керак.
Умумий муҳокамадан сўнг делегация иштирокчилар билан якка тартибда суҳбатлар ўтказди. Улар ўз ғоялари ва келгусидаги ҳамкорликнинг эҳтимолий йўналишларини махсус анкеталарда баён қилди.