Тошкент, Ўзбекистон (UzDaily.uz) — «Ўзбекнефтгаз» АЖ 2026 йил якунига қадар 1,1 миллион тонна бензин ишлаб чиқаришни режалаштирмоқда. Шунингдек, қиш мавсумида ички бозорни таъминлаш учун 102 минг тонна ёқилғи захирасини шакллантирди. Бу ҳақда компания ахборот хизмати хабар берди.
Йил бошидан буён Бухоро нефтни қайта ишлаш заводи 916,1 минг тонна бензин ишлаб чиқарди. Бу белгиланган режанинг 101 фоизини ташкил этади ва ўтган йилнинг шу давридаги кўрсаткичдан 1 фоизга юқори.
Ноябрь ойида компания 103,3 минг тонна бензин ишлаб чиқаришни режалаштирган. 2025 йилнинг шу ойида бу кўрсаткич 87,2 минг тоннани ташкил этган. Декабрь ойида эса ишлаб чиқариш ҳажми 123,1 минг тоннага етказилиши кутилмоқда. Ўтган йилнинг декабрь ойида 90 минг тонна бензин ишлаб чиқарилган.
Шу тариқа, йиллик ишлаб чиқариш ҳажми 1,1 миллион тоннага етиши керак. Бу 2025 йилда ишлаб чиқарилган 1,0306 миллион тонна бензинга нисбатан 7 фоизга кўп.
Ҳозирда завод бир суткада ўртача 3,2–3,4 минг тонна бензин ишлаб чиқармоқда. 2025 йилда суткалик ўртача кўрсаткич қарийб 2,8 минг тоннани ташкил этган.
Қишда ёқилғи етказиб бериш барқарорлигини таъминлаш мақсадида завод ва компаниянинг нефт базаларида жами 102 минг тонна захира шакллантирилган. Бу ўтган йилнинг шу давридаги 77 минг тонна захирадан 25 минг тоннага кўп. Компания баҳосига кўра, мавжуд захиралар икки ойлик истеъмолни қоплаш учун етарли.
«Ўзбекнефтгаз» совуқ тушиши даврида бензинга бўлган талаб ортиши мумкинлигини ҳам ҳисобга олмоқда. Қишда метан қуйиш шохобчалари фаолияти вақтинча чекланиши мумкин. Бу эса бензин истеъмолининг кўпайишига олиб келиши эҳтимолдан холи эмас.
Талаб ошган тақдирда компания биржа савдоларига чиқариладиган бензин ҳажмини суткасига 8 минг тоннагача, эҳтиёж янада ортса, 10 минг тоннагача кўпайтиришга тайёр.
Шу билан бирга, ички бозорни таъминлаш фақат «Ўзбекнефтгаз»га боғлиқ эмас. Ёқилғи етказиб беришнинг сезиларли қисми хориждан бензин импорт қиладиган хусусий компаниялар ҳиссасига тўғри келади. Компания маълумотларига кўра, хусусий бозор иштирокчилари томонидан бензин импорти 2026 йил июнь ойидан бошлаб кескин қисқарган.
Октябрь ойида импорт ҳисобига ички бозорга 5,5 минг тонна бензин етказиб берилган. Айни пайтда «Ўзбекнефтгаз» ҳар куни биржа савдоларига 4,6 минг тонна ёқилғи, жумладан, 4,3 минг тонна АИ-92 русумли бензин чиқармоқда. 2025 йилда компаниянинг биржага чиқарган ёқилғиси суткалик ўртача 2,2 минг тоннани ташкил этган.
Мавсумий талабни қондириш ва эҳтимолий тақчилликнинг олдини олиш мақсадида компания ўз тизимидаги корхоналар орқали тайёр бензин импортини ташкил этиш чораларини ҳам кўрмоқда.
«Ўзбекнефтгаз» ижтимоий тармоқларда қишда метан қуйиш шохобчалари фаолияти чекланиши мумкинлиги ҳақида тасдиқланмаган хабарлар тарқалишининг таъсирига ҳам эътибор қаратди. Компания баҳосига кўра, бундай хабарлар хусусий АЁҚШларда ёқилғи етишмаслиги мумкинлиги ҳақидаги хавотирларни кучайтирмоқда.
Натижада айрим операторлар олдиндан қўшимча ҳажмда бензин харид қилиш ва захира тўплашга ҳаракат қилмоқда. Бу эса харидорлар сони ва биржа савдоларидаги талабнинг ортишига, натижада нархлар кўтарилишига таъсир қилиши мумкин.
Шу билан бирга, «Ўзбекнефтгаз» томонидан биржага чиқарилаётган бензиннинг бошланғич нархи апрель ойидан буён ўзгармаган ва бир тоннаси учун 14 миллион сўмни ташкил этмоқда. Бу халқаро нефть котировкалари ҳар куни ўзгариб турган бир шароитда юз бермоқда.
Компания нархлар динамикасини баҳолашда нафақат ишлаб чиқариш ҳажми ва мавжуд захираларни, балки харидорлар фаоллиги, мавсумий кутилмалар ҳамда ижтимоий тармоқларда тарқатилаётган хабарларнинг талабга таъсирини ҳам ҳисобга олишга чақирди.
«Ўзбекнефтгаз» қиш мавсумида аҳолини сифатли бензин билан узлуксиз таъминлаш учун ўз ваколатлари доирасида зарур чораларни кўраётганини маълум қилди.