Шавкат Мирзиёев наркотаҳдидларга қарши курашни кучайтиришни таклиф қилди

Тошкент, Ўзбекистон (UzDaily.uz) — Шавкат Мирзиёев Самарқанд шаҳрида ўтказилган трансмиллий ннаркотаҳдидларга қарши курашишга бағишланган халқаро форум иштирокчиларига мурожаат йўллаб, ноқонуний наркотик моддалар айланмасига қарши курашда глобал ҳамкорликни мустаҳкамлаш зарурлигини таъкидлади.

Мурожаатда давлат раҳбари ҳозирги шароитда наркожиноятчиликнинг шакл ва усуллари жадал ўзгариб бораётганини қайд этди. Жумладан, рақамли технологиялар, шифрланган алоқа воситалари ва трансчегаравий молиявий схемалардан фаол фойдаланилаётгани таъкидланди. Унинг сўзларига кўра, бу ҳолат жаҳон ҳамжамиятидан мувофиқлаштирилган ва инновацион ечимларни талаб қилади.

Бирлашган Миллатлар Ташкилоти маълумотларига кўра, дунёда 300 миллиондан ортиқ инсон наркотик моддалар таъсирига дуч келмоқда, ҳар йили эса тахминан 600 минг киши бу билан боғлиқ оқибатлар қурбонига айланмоқда.

Таъкидланишича, Ўзбекистон наркомания ва наркожиноятчиликка қарши курашни умуммиллий вазифа сифатида кўради. Мамлакатда наркомания ва наркожиноятчиликка қарши курашиш бўйича Миллий стратегия қабул қилинган, шунингдек идоралараро ҳамкорлик ва профилактика чоралари кучайтирилган.

Мурожаатда келтирилган маълумотларга кўра, сўнгги йилларда Ўзбекистонда наркожиноятларни аниқлаш кўрсаткичлари ошган, мусодара қилинган наркотик воситалар ҳажми кўпайган, шунингдек уларни тарқатиш билан боғлиқ яширин лабораториялар ва интернет-ресурсларни бартараф этиш бўйича ишлар фаоллашган.

Ёшлар орасида профилактика ишларига алоҳида эътибор қаратилмоқда. Таъкидланишича, жиноятларнинг салмоқли қисми ёшлар томонидан содир этилаётгани ушбу муаммони мамлакат келажаги учун айниқса долзарб қилади. Шу муносабат билан Ўзбекистонда таълим ва жамоатчилик ташаббуслари кенгайтирилмоқда, жумладан «Анти-Нарко» волонтёрлик ҳаракати ҳамда сунъий интеллектдан фойдаланувчи лойиҳалар амалга оширилмоқда.

Халқаро ташаббуслар қаторида турли мамлакатлар ҳуқуқни муҳофаза қилувчи органлари ўртасида ахборот алмашиш учун ягона рақамли платформани яратиш, шунингдек сунъий интеллект технологияларидан фойдаланган ҳолда наркотрафикни эрта аниқлаш воситаларини ривожлантириш таклиф этилди.

Шунингдек, наркобизнес билан боғлиқ молиявий оқимлар устидан назоратни кучайтириш, жумладан криптовалюта операциялари ва офшор ҳудудлар билан боғлиқ фаолиятни тартибга солиш, молиявий шаффофликнинг янги халқаро стандартларини ишлаб чиқиш бўйича таклифлар илгари сурилди.

Бундан ташқари, мурожаатда синтетик наркотикларга қарам бўлган шахсларни даволаш ва реабилитация қилиш усулларини ишлаб чиқиш учун халқаро платформа яратиш, шунингдек уни Самарқанд шаҳрида жойлаштириш имконияти билан Марказий Осиё наркологлари ассоциациясини ташкил этиш таклиф қилинди.

Президент наркотикларга қарши кураш халқаро ҳамжамиятнинг умумий масъулияти бўлиб қолиши кераклигини таъкидлаб, форум якуний натижалари глобал хавфсизлик ва аҳоли саломатлигини мустаҳкамлашга хизмат қилишига ишонч билдирди.