Тошкент, Ўзбекистон (UzDaily.uz) — Ўзбекистон Президенти Шавкат Мирзиёев 2026/2027 йиллар иситиш мавсумида аҳолини қўшимча ижтимоий қўллаб-қувватлаш ҳамда ёқилғи-энергетика соҳасида бозор механизмларига босқичма-босқич ўтиш бўйича қўшимча чора-тадбирлар тўғрисидаги фармонни имзолади.
2026 йил 28 октябрда қабул қилинган ҳужжат эҳтиёжманд оилаларга бир марталик моддий ёрдам тўлаш, давлат ёрдамини тақдим этиш мезонларини кенгайтириш ва амалдаги компенсация механизмлари муддатини узайтиришни назарда тутади.
2026 йил ноябрь ойида бир қатор тоифадаги фуқароларга 1 млн сўм миқдорида бир марталик моддий ёрдам берилади.
Биринчи навбатда, ушбу тўловлар Ижтимоий реестрга киритилган оилаларга мўлжалланган. Шунингдек, реестрга киритилмаган, аммо «маҳалла еттилиги» хулосаси асосида белгиланган эҳтиёжмандлик мезонларига жавоб берадиган хонадонлар ҳам ёрдам олиш ҳуқуқига эга бўлади.
Бу тоифага жон бошига тўғри келадиган ўртача даромади минимал истеъмол харажатларининг икки бараваридан ошмайдиган оилалар киради. Марказлашган иситиш тизимига уланган кўп квартирали уйларда яшовчи оилалар учун алоҳида чегара белгиланган: Қорақалпоғистон Республикаси ва вилоятларда бир киши ҳисобига икки минимал истеъмол харажатидан, Тошкент шаҳрида эса уч минимал истеъмол харажатидан ошмаслиги керак.
Даромади белгиланган меъёрдан юқори бўлган айрим эҳтиёжманд оилалар ҳам туман ёки шаҳарларда барқарор иш ўринларини яратиш ва аҳоли даромадларини ошириш бўйича штаблар тегишли қарор қабул қилган тақдирда, ёрдам олиши мумкин.
Ёрдам олувчилар қаторига ёлғиз яшовчи, ўзгалар парваришига муҳтож бўлган ва тегишли реестрга киритилган кексалар ҳамда ногиронлиги бўлган шахслар ҳам киритилган. Шунингдек, ота-она қарамоғидан маҳрум бўлган етим болалар ва болалар тарбияланаётган оилаларга ҳам тўловлар назарда тутилган.
Фармон билан бир қатор ижтимоий ёрдам турларини тақдим этиш мезонлари ҳам кенгайтирилди. Хусусан, электр энергияси ва табиий газ харажатлари учун компенсация тайинлашда жон бошига тўғри келадиган энг юқори даромад чегараси минимал истеъмол харажатларининг бир ярим бараваридан икки бараварига оширилди.
Кўмир харид қилиш учун ёрдам олишда даромад чегараси минимал истеъмол харажатларининг бир бараваридан икки бараварига кўтарилди. «Саховат ва кўмак» жамғармаси ҳисобидан кўрсатиладиган ёрдам учун ҳам худди шундай ўзгариш белгиланди. Ушбу жамғарма маблағлари коммунал хизматлар бўйича қарздорликни қоплаш, жорий харажатларни тўлаш ва ёқилғи сотиб олишга йўналтирилиши мумкин.
Бундан ташқари, айрим ижтимоий қўллаб-қувватлаш чораларининг амал қилиш муддати узайтирилди. Электр энергияси ва табиий газнинг базавий ҳамда оширилган тарифлари ўртасидаги фарқни қоплаш учун компенсация тўлаш 2028 йил 1 апрелгача давом эттирилади.
Кўмир харид қилиш харажатларининг бир қисмини қоплаш учун моддий ёрдам тўлаш муддати эса 2029 йил 1 январгача узайтирилди.
Кутилишича, фармонда белгиланган чора-тадбирлар кам даромадли оилаларни ижтимоий қўллаб-қувватлаш қамровини кенгайтириш ва энергетика соҳасида бозор тарифларига ўтиш оқибатларини юмшатиш имконини беради.
