Тошкент, Ўзбекистон (UzDaily.uz) — Ўзбекистон 2035 йилгача саноатни ривожлантириш стратегиясини тайёрлашга McKinsey & Company консалтинг компаниясини жалб этишни режалаштирмоқда. Америка компанияси вакиллари билан учрашув Стратегик ривожланиш ва ислоҳотлар агентлигида бўлиб ўтди.
Учрашув иштирокчилари бўлажак ҳужжат концепцияси ва саноат сиёсатининг асосий йўналишларини кўриб чиқдилар. Иқтисодиёт ва молия вазирлиги стратегияни ишлаб чиқишда маслаҳат ёрдамини кўрсатиш учун McKinsey компаниясини жалб этишни режалаштирмоқда.
Ўзбекистон саноатининг минтақавий ва жаҳон бозорларидаги рақобатбардошлигини ошириш, инсон капиталини ривожлантириш ҳамда ташқи бозор конъюнктурасидаги ўзгаришлар билан боғлиқ хатарларни ҳисобга олишга алоҳида эътибор қаратиш кўзда тутилган.
Шунингдек, стратегияда ички бозор имкониятлари ва Ўзбекистоннинг Жаҳон савдо ташкилотига аъзо бўлиш жараёни ҳам инобатга олиниши керак.
Яна бир йўналиш саноатни нафақат алоҳида тармоқлар, балки ҳудудларнинг ўзига хос хусусиятларини ҳисобга олган ҳолда ривожлантиришдан иборат. Бунда республика, вилоят, туман ва маҳалла даражаларидаги хусусиятларга эътибор қаратилади.
Ҳужжатда тегишли таъсирни баҳолаш учун экологик, ижтимоий ва корпоратив бошқарув (ESG) тамойилларини қўллаш ҳам назарда тутилиши режалаштирилган.
McKinsey вакиллари саноат ишлаб чиқаришини маҳаллийлаштириш стратегик аҳамиятга эга эканини таъкидлаб, ушбу йўналишда Ўзбекистон билан ҳамкорлик қилишга тайёр эканликларини билдирдилар.
Стратегик ривожланиш ва ислоҳотлар агентлиги таркибий ислоҳотлар доирасида давлат органлари томонидан хорижий экспертлар ва консалтинг компанияларини жалб этиш жараёнини мувофиқлаштиради. Мазкур ваколатлар Ўзбекистон Президентининг 2025 йил 30 октябрдаги ПФ-201-сон фармони билан белгиланган.
Учрашув якунида томонлар бўлажак стратегиянинг асосий йўналишлари, жумладан, ҳудудларнинг саноат ихтисослашуви масалалари бўйича мунтазам маслаҳатлашувлар ўтказишга келишиб олдилар.
