Тошкент, Ўзбекистон (UzDaily.uz) — 11 октябрь куни Ўзбекистон Фавқулодда вазиятлар вазирлиги қутқарувчилари Тошкент вилоятининг Бўстонлиқ туманидаги Катта Чимён тоғларида адашиб қолган етти нафар фуқарога ёрдам кўрсатди.
Соат 13:26 да вилоят фавқулодда вазиятлар бошқармасига «112» тизими орқали тоғда сайр қилиш учун йўлга чиққан бир гуруҳ одам мустақил равишда пастга туша олмаётгани ҳақида хабар келиб тушди.
Воқеа жойига етиб борган қутқарувчилар қидирув-қутқарув ишларини олиб бориб, адашиб қолган фуқароларни топдилар ва уларни хавфсиз жойга олиб чиқдилар.
Фавқулодда вазиятлар вазирлиги маълумотларига кўра, ҳодиса оқибатида ҳеч ким жабрланмаган.
