Тошкент, Ўзбекистон (UzDaily.uz) — Тошкентда Германия меҳнат бозори эҳтиёжларини инобатга олган ҳолда Ўзбекистонда мутахассислар тайёрлашга бағишланган навбатдаги Ўзбекистон–Германия учрашуви бўлиб ўтди.
Муҳокамада Миграция агентлиги директори Муҳсинхўжа Абдураҳмонов, Германиянинг GP Günter Papenburg AG компанияси директори Ангела Папенбург, Германиянинг Тошкентдаги элчихонаси вакили Ева Шнайдер, GIZнинг Ўзбекистондаги жамоаси раҳбари Маттиас Клингенберг, шунингдек, Германия иш берувчилари ва касбий тайёргарлик билан шуғулланувчи ташкилотлар вакиллари иштирок этди.
Асосий мавзулардан бири мутахассисларни муайян очиқ вакансияга эмас, балки эҳтимолий иш берувчи талабларига мос келадиган муайян касб ва малакага эга бўлишга йўналтирилган ҳолда тайёрлашни ташкил этиш бўлди.
Учрашув иштирокчилари Ўзбекистондаги ўқув дастурларини Германия меҳнат бозори эҳтиёжларига мослаштириш имкониятларини кўриб чиқди. Иш берувчиларнинг мутахассислар малакасига қўяётган талабларига алоҳида эътибор қаратилди.
Шунингдек, томонлар фуқароларни Германияга кетишидан олдин тайёрлаш ва улар мамлакатга келганидан кейин кейинги интеграцияси масалаларини муҳокама қилди.
Учрашув мутахассисларни касбий тайёрлаш ҳамда уларни Германия меҳнат бозорида иш билан таъминлаш имкониятлари масалалари бўйича Ўзбекистон–Германия мулоқотининг навбатдаги босқичи бўлди.
