Тошкент, Ўзбекистон (UzDaily.uz) — Ўзбекистон прокуратура органлари 2026 йилнинг тўққиз ойида 55 898 нафар фуқаронинг бузилган ҳуқуқларини тиклади. Бунинг учун прокурор назоратининг 1 508 та ҳужжати қўлланилди.
Фуқаролар ва юридик шахсларнинг мурожаатлари билан ишлаш якунларини 27 октябрь куни Бош прокуратуранинг мурожаатлар билан ишлаш бошқармаси бошлиғи ўринбосари Мурадилжон Муминов ОАВ учун контент тайёрлаш марказида ўтказилган брифингда тақдим этди.
«Жисмоний ва юридик шахсларнинг мурожаатлари тўғрисида»ги қонун ижроси юзасидан ўтказилган текширувлар натижасида вазирлик ва идораларга 116 та тақдимнома киритилди, қонунга зид ҳужжатларга нисбатан 434 та протест келтирилди. 321 нафар шахс интизомий, маъмурий ва моддий жавобгарликка тортилди, 222 нафар мансабдор шахс расман огоҳлантирилди. Судларга 25,6 миллиард сўмлик зарарни ундириш бўйича 177 та даъво аризаси киритилди. Яна 7,9 миллиард сўм зарар ихтиёрий равишда қопланди.
Жами январь–сентябрь ойларида прокуратура органларига 299 649 та мурожаат келиб тушди. Шундан 178 493 таси ёки 59,5 фоизи бевосита прокуратура томонидан кўриб чиқилди. 50 087 та мурожаат қаноатлантирилди, 126 058 та мурожаат бўйича ҳуқуқий тушунтириш берилди.
Президентнинг Виртуал ва Халқ қабулхоналари орқали 142 884 та мурожаат келиб тушди. Прокуратура уларнинг 119 690 тасини ёки 83,7 фоизини бевосита кўриб чиқди. 30 326 та мурожаат қаноатлантирилди (25,3 фоиз), 84 652 та мурожаат бўйича (70,7 фоиз) тушунтириш берилди.
Прокуратура ходимлари тўққиз ой давомида 220 240 нафар фуқарони қабул қилди. Уларнинг 60 371 нафари сайёр ва оммавий қабулларда иштирок этди.
Бош прокуратура ходимлари 29 094 нафар фуқарони қабул қилди. Бош прокурор ва унинг ўринбосарлари шахсан 182 нафар фуқаро ҳамда юридик шахслар вакилини қабул қилди. Ижтимоий-иқтисодий аҳволи нисбатан мураккаб бўлган 5 038 та маҳаллада сайёр қабуллар ўтказилди. Уларда 28 156 нафар фуқаро мурожаат қилди, 13 548 та мурожаат (48,1 фоиз) жойида ҳал этилди.
Мурожаатларнинг энг кўпи Ички ишлар вазирлиги тизимидаги терговга қадар текширув, суриштирув ва тергов масалаларига тааллуқли бўлиб, уларнинг сони 45 313 тани ташкил этди. Иккинчи ўринда ижтимоий-иқтисодий масалалар — моддий ёрдам, нафақалар, болалар нафақалари, тиббий хизмат, банк кредитлари ва бошқа масалалар бўйича 39 042 та мурожаат қайд этилди. Учинчи ўринда суд қарорлари ва бошқа органлар ҳужжатларининг ижроси, жумладан, алимент ундириш ҳамда Мажбурий ижро бюроси ходимларининг хатти-ҳаракатлари билан боғлиқ 21 257 та мурожаат турди.
Ўтган йил билан таққослаганда, терговга қадар текширув, суриштирув ва тергов масалалари бўйича мурожаатлар сони 3 316 тага кўпайди. Фуқаролик ишлари бўйича суд қарорларига оид мурожаатлар 2 199 тага, жазони ижро этиш муассасалари ходимларининг қонунга хилоф хатти-ҳаракатлари юзасидан шикоятлар эса 1 144 тага ошди.
Такрорий мурожаатлар сони 3 636 тани ташкил этди. Улар орасида суд қарорларини ижро этиш, жумладан, алимент ундириш масалалари бўйича 651 та, Ички ишлар вазирлиги тизимидаги тергов масалалари бўйича 549 та ва ижтимоий-иқтисодий масалалар бўйича 474 та такрорий мурожаат бўлган.
Президентнинг 2026 йил 13 март куни видеоселектор йиғилишида берган топшириғига мувофиқ, Қарши шаҳрида фуқаролар мурожаатлари билан ишлашнинг намунавий тизими яратилмоқда. Ҳаракатлар режаси ишлаб чиқилди. Қашқадарё вилоятининг бошқа туман ва шаҳарларида ҳам маҳаллий Кенгашлар қарорлари билан шунга ўхшаш чора-тадбирлар тасдиқланди.
16 мартдан 18 майга қадар ҳар бир ҳудудда мурожаатларда кўтарилган муаммоларни манзилли ҳал этиш учун биттадан туман ёки шаҳар танлаб олинди. Улар қаторига Қарши, Термиз, Бухоро, Нукус, Наманган, Ғаллаорол, Андижон, Гулистон, Янгийўл, Қува, Урганч, Самарқанд шаҳарлари, Чилонзор тумани ва Кармана кирди. Аниқланган қонунбузилишлар юзасидан прокурор назоратининг 1 380 та ҳужжати қўлланилди.
Ташкилотларга 421 та тақдимнома киритилди. 436 нафар масъул ходим интизомий, 512 нафари эса маъмурий жавобгарликка тортилди.
